2018 թվականի ընթացքում Սյունիքում գրանցվել է 793 արտակարգ դեպք (2017 թվականին` 775), որոնց հետեւանքով զոհվել է 39, տուժել 193 մարդ: Տեխնածին բնույթի դեպքերից 496-ը հրդեհ է (2017 թվականին՝ 413): Գրանցվել է 3 փլուզում, որոնց հետեւանքով տուժել եւ զոհվել է 2-ական քաղաքացի։
Անցկացվել են 1 շտաբային, 1 ցուցադրական հատուկ տակտիկական, 96 հատուկ տակտիկական ուսումնավարժություն, ինչպես նաեւ դասախոսություններ 26 դպրոցում, մասնակցություն է ցուցաբերվել մարզի 30 համայնքում եւ 11 կազմակերպությունում անցկացված շտաբային, օբյեկտային վարժանքներին։ Կապանի, Գորիսի, Սիսիանի եւ Մեղրիի ճանապարհաշինական ընկերությունների հետ անցկացվել են հատուկ տակտիկական ուսումնավարժություններ՝ «Ճանապարհների մաքրման աշխատանքների կազմակերպումը ձմռանը» թեմայով:
Մարզային քաղաքային որոնողափրկարարական թիմը մասնակցել է «Երկրաշարժի դեպքում որոնողափրկարարական աշխատանքների կազմակերպում եւ իրականացում» թեմայով 36-ժամյա հերթական դաշտային վարժանքին՝ կատարելագործելով հմտությունները։
Ուսումնասիրվել են մարզում առկա հակաճառագայթային թաքստոցներն ու ապաստարանները, ազդարարման համակարգի թերությունները։ Մարզի բնակչության ազդարարման համար պահանջվում է 170 էլեկտրական շչակ, առկա է 149-ը։
Ձեռքբերումներ
Մեղրիի եւ Գորիսի հրշեջ-փրկարարական ջոկատները համալրվել են «Գազել» եւ «Կամազ АСА» մակնիշի ավտոմեքենաներով։ Վարչությունը հայ-ռուսական մարդասիրական արձագանքման կենտրոնից ստացել է նոր գույք-սարքավորումներ։ Կապիտալ վերանորոգվել է Գորայքի հենակետը, կառուցվել է ավտոմեքենայի կայանատեղի, որտեղ շուրջօրյա հերթապահություն է իրականացնում Սիսիանի հրշեջ-փրկարարական ջոկատը։ Առանձին վարորդներ եւ կամավոր հրշեջներ անցել են համապատասխան ուսուցում՝ հենակետից օպերատիվ արձագանքում իրականացնելու նպատակով։
Պատրաստեց Անի ԱՆՏՈՆՅԱՆԸ
Այլ մարզեր եւ մայրաքաղաք.
