Օգոստոսի 15-21-ն ընկած ժամանակահատվածում Արցախի Հանրապետության ներքին գործերի նախարարության արտակարգ իրավիճակների պետական ծառայության 911 ճգնաժամային կառավարման կենտրոնը գրանցել է 1376 ահազանգ, որոնցից 1239-ը` արտակարգ:
Շաբաթվա ընթացքում գրանցվել է տեխնածին 18, բնածին 21 եւ սոցիալ-կենցաղային բնույթի 15 կանչ:
Հրդեհների կտրուկ աճի պատճառով ծառայության կենտրոնական ապարատի հրշեջ-փրկարար մասն ու արագ արձագանքման հատուկ ստորաբաժանման հերթապահ խմբերը բերվել են մարտական պատրաստականության բարձր աստիճանի, սահմանվել է շուրջօրյա հերթապահություն:
Հրդեհի 42 դեպքերի մեծ մասը եղել է չոր խոտածածկ տարածքներում: Ծառայության հրշեջ-փրկարարների օպերատիվ աշխատանքի շնորհիվ տուժածներ չկան:
Փրկարարները բացել են 10 դուռ, բնակչությանը ջուր մատակարարելու նպատակով կատարվել է 1 ելք: Իրականացվել է նաեւ բարձրության վրա աշխատանք, գրանցվել է այլ բնույթի 2 կանչ:
Օձի հայտնաբերման վերաբերյալ ստացվել է 1 ահազանգ: Թունավոր սողունը տեղափոխվել է անվտանգ տարածք:
ԱԻՊԾ սակրավորական խմբերը գործընկեր կառույցների հետ իրականացրել են չպայթած զինամթերքի հայտնաբերման աշխատանք: Ընդհանուր առմամբ` շաբաթվա ընթացքում վնասազերծվել է 52 պայթուցիչ, հակատանկային 1 ական, 7 հրթիռ, հրթիռակասետային 3 ռումբ, ականանետի 13 ական, գնդիկաբեկորային 2 ավիառումբ, 25 ձեռքի եւ 12 նռնականետի նռնակ:
