Այս շաբաթ Արագածոտնի մարզային փրկարարական ստորաբաժանումներն անցկացրել են մի շարք վարժանքներ։ Ագարակի հիմնական եւ Սադունցի հիմնական դպրոցներում թեման ուսումնական հաստատություններում հրդեհաշիջումն ու տարհանման կազմակերպումն էր։ Կաթնաղբյուրի մշակույթի տանը Թալինի հրշեջ-փրկարարական ջոկատն իրականացրել է «Հրդեհաշիջման եւ տարհանման կազմակերպումը մշակույթի տներում» թեմայով վարժանք։ Վարչության ծառայողները «Տելեկոմ Արմենիա» ընկերության Աշտարակի տեղամասում ցուցադրել եւ խոսել են կապի համակարգի վթարի դեպքում վթարավերականգնողական խմբերի գործողություններից։
Տավուշի մարզի Նոյեմբերյանի թիվ 1 հիմնական, Ոսկեւանի եւ Բաղանիսի դպրոցներում շաբաթվա ընթացքում նախատեսված էին դասախոսություններ՝ արտակարգ իրավիճակների, քաղաքացիական պաշտպանության եւ առաջին օգնության հիմնահարցերով։
Մարտի 18-ին Վայոց ձորի տարածաշրջանային պետական քոլեջում անցկացվել է «Անձնակազմի պատսպարման իրականացումը «Օդային տագնապ» ազդանշանի դեպքում» թեմայով հատուկ տակտիկական ուսումնավարժություն, որին մասնակցել են 203 ուսանող եւ դասախոսական կազմը, ինչպես նաեւ մարզային փրկարարական վարչության ներկայացուցիչներ:
Պատրաստեց Անի ԱՆՏՈՆՅԱՆԸ
