Միավորված ազգերի կազմակերպության աղետների ռիսկի նվազեցման գրասենյակը (UN Office for Disaster Risk Reduction՝ UNISDR) անցած շաբաթ պաշտոնապես հայտարարեց Աղետների ռիսկի նվազեցման Սենդայի 2015-2030 թթ. գործողությունների ծրագրի մոնիթորինգի համակարգի գործիքակազմը աշխատեցնելու հմտություները կատարելագործելու առցանց դասընթացի ծրագրի հասանելության մասին:
UNISDR-ի նախաձեռնությամբ ստեղծվել է եւս մեկ գործիք՝ sendaicommitments.unisdr.org առցանց հարթակը, որտեղ երկրները կարող են ներկայացնել աղետների ռիսկի կառավարման ոլորտում իրենց ձեռքբերումներն ու հաջողություննները, կիսվել փորձով: Ողջը կամավորության հիմքով: Որեւէ պետություն փորձով կիսվելու որեւէ պարտավորություն չունի:
Միավորված ազգերի կազմակերպության գլխավոր քարտուղարի՝ Աղետների ռիսկի նվազեցման հարցերով հատուկ ներկայացուցիչ Մամի Միզութորին հայտարարել է. «Հասարակությունը չի կարող անտեսել որեւէ մեկին, երբ խոսքը աղետների ռիսկի նվազեցման, աղետակայուն հասարակություն ձեւավորելու մասին է: Այս հարթակով կխրախուսվեն բոլորի ջանքերը՝ անհատներ, կազմակերպություններ, մասնավոր հատված, կրթական հաստատություններ, լրատվամիջոցներ, պետական եւ տեղական ինքնակառավարման մարմիններ»:
Մասնագետների խոսքով, կայքը արդյունավետ, պարզ եւ հասկանալի գործիք է եւ հնարավորություն է տալիս ոչ միայն արձանագրել գործողություններն ու դրանց արդյունքները, այլ նաեւ՝ լայնորեն տարածել հաջողված փորձը: Իսկ որ աղետների ռիսկի կառավարման ոլորտում ջանքերի մեկտեղում է պետք՝ ընդունում են բոլորը:
Ավելի քան 50 կազմակերպություն արդեն նյութեր է ուղարկել: Մեկ շաբաթից դրանք հասանելի կլինեն բոլորին:
Այս տարվա մայիսի 13-17-ը Շվեյցարիայի Ժնեւ քաղաքում տեղի կունենա «Աղետների ռիսկի նվազեցման գլոբալ պլատֆորմ» վեցերորդ համաժողովը, որտեղ կներկայացվեն նաեւ sendaicommitments.unisdr.org կայքով ստացված զեկույցները:
