Միավորված ազգերի կազմակերպության փորձագետները վստահ են, որ, աղետների ռիսկի նվազեցման, մարդկային եւ տնտեսական կորուստների կրճատման ծրագրերում եւ գործողություններում առանցքային դեր ունեն տեղական իշխանությունները՝ համայնքները: «Տեղական իշխանությունները՝ համայնքները պիտի ունակ եւ կարող լինեն առաջինն արձագանքել աղետին»,- հայտարարել է ՄԱԿ-ի Ժնեւի գրասենյակում Ինդոնեզիայի ներկայացուցիչ Անդրեանո Էրվինը:
Ըստ փորձագետի, առաջինը, որ պիտի անեն համայնքները՝ վաղ ազդարարման համակարգ տեղադրելն է, որը կդառնա համակարգված աշխատելու, դիմակայուն համայնք ձեւավորելու, կյանքեր փրկելու առաջին քայլը: «Աղետների ռիսկի նվազեցումը հավասար է աղքատության ռիսկի նվազեցմանը», — կարծում են փորձագետները:
Հայաստանը այս հարցում կարող է օրինակ ծառայել: 2017-ի ապրիլի 6-ին ՀՀ կառավարությունը հաստատեց «Աղետների ռիսկի կառավարման ազգային ռազմավարությունը» եւ դրա իրականացման գործողությունների 2017-2030 ծրագիրը: Ծրագրի տրամաբանության մեջ արտակարգ իրավիճակների նախարարությունը մշակեց «Աղետների ռիսկերի կառավարումը տեղական մակարդակում» կիրառական ուղեցույցը, որն ընդունվեց նույն տարվա հոկտեմբերին: Տեղական մակարդակում ռիսկի կառավարման նպատակն է նպաստել Հայաստանում աղետներին դիմակայուն համայնքների կայացմանն ու զարգացմանը:
