Տարվա եղանակի ամփոփում՝ առաջիկա ձմռան կանխատեսում
Չորեքշաբթի ՀՀ ԱԻՆ «Հիդրոմետ» ծառայության oդերևութաբանության կենտրոնի պետ Գագիկ Սուրենյանը «Ազդակ» ակումբում լրագրողների հետ հանդիպման ժամանակ ամփոփեց անցնող տարին և ներկայացրեց առաջիկա ձմռան կանխատեսումները: Ըստ Գագիկ Սուրենյանի՝ ընթացիկ տարին առանձնացավ եղանակակլիմայական պայմանների անոմալիաներով: Առաջին անոմալ երևույթն արձանագրվեց տարեսկզբին, երբ հունվար-փետրվարին Արարատյան դաշտում տևական ժամանակ պահպանվում էր մառախուղը և ցածր ջերմային ֆոնը: «Արարատյան դաշտում 60 օր շարունակ սառը օդի լճացում եղավ: Ըստ վիճակագրական տվյալների՝ նման ձմեռներ Արարատյան դաշտում լինում են 50 տարին մեկ անգամ: Այս ձմռանը Արարատյան դաշտում առանձին օրերին կլինի մառախուղ, սակայն երկարատև սառը օդի լճացում և արևի բացակայություն չի կանխատեսվում»,- տեղեկացրեց նա: Հունվար-փետրվարին օդի ամսական միջին ջերմաստիճանը ցածր էր նորմայից 8-9 աստիճանով: 2017-ի գարունն անցել է նորմայի սահմաններում, իսկ ահա ամառը՝ հատկապես հուլիս-օգոստոս ամիսները, աչքի ընկան աննախադեպ շոգ եղանակով: Արարատյան դաշտում oդի առավելագույն ջերմաստիճանը 42,6 0C է եղել, Երևանում՝ 41,8 0C: «100 տարվա կտրվածքով այս ամառը բացառիկներից էր. գրեթե 13-15 օր Երևանում և Արարատյան դաշտում ջերմաստիճանը բարձր էր 40 աստիճանից: Տեղումների քանակը հուլիսին և օգոստոսին խիստ պակաս էր նորմայից, ինչի հետևանքով հանրապետության տարբեր տարածքներում ունեցանք անտառային հրդեհներ, որոնք իրենց ուժգնությամբ, ինտենսիվությամբ, տարածական ընդգրկվածությամբ աննախադեպ էին հանրապետության համար: 2017-ը բացառիկ էր նաև նրանով, որ ցրտահարություն չունեցանք, ինչի շնորհիվ ունեցանք առատ բերք: Այս տարվա աշնանը գրանցված տեղումների քանակն ու օդի ջերմաստիճանը նորմայի սահմաններում էր»,- տեղեկացրեց «Հիդրոմետ» ծառայության օդերևութաբանության կենտրոնի պետ Գագիկ Սուրենյանը:
Իսկ ինչ վերաբերում է այս ձմռանը, ապա դեկտեմբերին, հունվարին և փետրվարին միջին ամսական ջերմաստիճանը և տեղումների քանակը կլինի նորմայի սահմաններում, թեև ժամանակ առ ժամանակ Հայաստանը կհայտնվի ինչպես տաք օդային հոսանքների, այնպես էլ արկտիկական ցուրտ օդային հոսանքների ազդեցության գոտում:
Արարատում, Արմավիրում, Արագածոտնի նախալեռնային գոտիներում, Կոտայքի նախալեռնային գոտիներում և Վայոց ձորի նախալեռնային գոտիներում տաք օդի ներթափանցման դեպքում՝ ցերեկային ժամերին օդի ջերմաստիճանը կարող է հասնել +8…+10 աստիճանի, որը ձմռան համար բավականին բարձր ցուցանիշ է, բայց որոշ ժամանակահատվածներում՝ արկտիկական ցուրտ օդային զանգվածների ներխուժման դեպքում, գիշերային ժամերին ջերմաստիճանը կիջնի մինչև -22… -24 աստիճան: «Շիրակում, Գեղարքունիքում, Արագածոտնի լեռնային գոտիներում, Կոտայքի և Վայոց ձորի լեռնային գոտիներում տաք օդի ներհոսքի դեպքում՝ ձմռան ընթացքում կլինեն ժամանակահատվածներ, որ ցերեկային ջերմաստիճանները կհասնեն մինչև 0…+5 աստիճանի, իսկ արկտիկական ցուրտ ճակատների անցման ժամանակ ՝ գիշերային ժամերին կդիտվի մինչև -25…-30 աստիճան ցուրտ: Լոռիում տաք օդի ներհոսքի դեպքում ցերեկային ժամերին առավելագույն ջերմաստիճանը կարող է հասնել +5…+10 աստիճանի, իսկ արկտիկական ցուրտ հոսանքների ներթափանցման դեպքում՝ գիշերը կգրանցվի մինչև -22…-27 աստիճան ցուրտ: Տավուշում առանձին օրերին օդի ջերմաստիճանը կբարձրանա +8… +13-ի, իսկ ցուրտ օդի ներհոսքի դեպքում՝ գիշերը կհասնի -12…-16 աստիճանի: Սյունիքի մարզն ամենատաքն է: Սյունիքի նախալեռնային գոտիներում ցերեկային ժամերին ջերմաստիճանն առանձին օրերին կհասնի առավելագույնը +2…+7 աստիճանի, հովտային գոտում՝ +10…+14, իսկ արկտիկական ցուրտ օդի ներթափանցման դեպքում՝ հովտային գոտում գիշերային ժամերին կարող է նվազել մինչև -10…-15 աստիճանի, իսկ լեռնային շրջաններում՝ -15…-20 աստիճանի»:
Ձմռանը Երևանում ամենատաք օրերին օդի ջերմաստիճանը կհասնի +8…+10 աստիճանի, իսկ ամենացուրտ օրերին՝ ցածրադիր գոտիներում կհասնի -20…-22 աստիճանի, բարձրադիր հատվածներում՝ -11…-13-ի: Ի տարբերություն նախորդ տարվա, երբ նորմայից ցածր տեղումներ էին գրանցվել, այս ձմռանը տեղումների պակաս չի լինի:
Ձյան առատ տեղումներ հանրապետության տարածքում դեռևս չեն կանխատեսվում: Դեկտեմբերի 1-5-ը Հայաստանի ամբողջ տարածքում սպասվում է առանց տեղումների եղանակ:
Մերի ՍՈՂՈՄՈՆՅԱՆ
