Արցախի հանրապետության ներքին գործերի նախարարության արտակարգ իրավիճակների պետական ծառայության ճգնաժամային կառավարման կենտրոնում նախորդ շաբաթ գրանցվել է 722 զանգ: 659-ը եղել է ճանաչողական բնույթի, 15-ը տեխնածին բնույթի պատահարներ են, 20-ը՝ կենցաղային բնույթի կանչեր: 911 ահազանգման կենտրոնի հերթապահ ծառայողները 62 հոգու տվել են հեռախոսային խորհրդատվություն:
Գրանցվել է երկու հրդեհ՝ մեկը բռնկվել է Ստեփանակերտի բնակելի շենքերից մեկի նկուղում, մյուսը՝ բնակարաններից մեկում գազի բալոնից արտանետված գազից: Հրշեջ փրկարարները ժամանակին արձագանքել են կանչերին եւ արագ մեկուսացրել կրակը: Տուժածներ չկան:
Պայմանավորված եղանակի կտրուկ տաքացմամբ՝ ԱԻ պետական ծառայությունը կրակի հետ զգույշ վարվելու կոչ է անում, միաժամանակ հիշեցնում տարվա այս սեզոնին ակտիվացող սողունների շարժի մասին, քանի որ թունավոր օձերի դեմ պայքարը՝ համալիր մոտեցման խնդիր է:
Անցած շաբաթվա ընթացքում սողանքի 2 դեպք է գրանցվել Ստեփանակերտ քաղաքի «Մազի կամուրջից» Հին Արմենավան թաղամաս տանող ճանապարհի հատվածում: Փրկարարները ժամանել են դեպքի վայր՝ սահմանազատել տարածքը եւ բացել ճանապարհը:
Կենցաղային բնույթի 5 կանչով փրկարարները բուժհաստատություն են տեղափոխել եւ վերադարձրել առողջական խնդիր ունեցող քաղաքացիներին: Վեց դեպքում բացել են փակ դուռը, երկու դեպքքւմ քաղաքացիներին ազատել խափանված վերելակից:
Ցանկացած աղետի, ճգնաժամի կամ պատահարի պահին հիշեք՝ 911 հեռախոսահամարը: ՆԳ նախարարության ստորաբաժանումները շարունակում են 24-ժամյա ծառայություն իրականացնել հանրապետության ողջ տարածքում:
Արցախի ՆԳՆ արտակարգ իրավիճակների պետական ծառայություն
