Հստակ ու միանշանակ պարզ չէ, թե որ երկրում եւ ինչպես է որոշվել ապրիլի մեկին նշել Հիմարների օրը (Fools’ Day) կամ Ծիծաղի օրը: Շատ երկրներ տարբեր վարկածներ են առաջ քաշում եւ փորձում ապացուցել, որ երգիծանքին, հումորին, ծիծաղին մեծ տեղ տալու որոշումը հենց իրենց պապերն են կայացրել: Բազմաթիվ են կատակի ու հումորի մասին փիլիսոփաների գնահատականները. եթե մարդը կատակ չի հասկանում, կորած մարդ է (Չեխով), առանց հումորի ապրում են միայն հիմարները (Պրիշվին), հումորը փրկագոտի է կյանքի ալիքներում (Ռաբլե) եւ այլն:
Հայաստանի հանրապետության «Տոների եւ հիշատակի օրերի մասին» օրենքով, ապրիլի մեկին Հայաստանում նշվում է «Երգիծանքի եւ հումորի օրը»: Տոնը նշվում է 2006 թվականից: Մեր փրկարարները, երբեմն այնպիսի կանչեր են ստանում, որոնց առանց ապրիլմեկյան տրամադրության, առանց հումորի նայել պարզապես չես կարող: Ներկայացնում ենք 911 ծառայության ստացած որոշ զվարճալի կանչերը:
- Լոգարանի կախովի առաստաղի տակ կանաչավուն օձ կա: Դեպքի վայր մեկնած փրկարարները պարզում են, որ կանաչավուն օձն իրականում ջահի կանաչ կախիչն է:
- Մայրս եւ երեխաներս մեր ամառանոցում են, օձ է նկատվել, հասեք: Դեպքի վայր մեկնած փրկարարները հայտաբերում են ահազանգողի քրոջը եւ սիրեկանին: Մայրն ու երեխաները ամառանոց չեն եկել:
- Մեր հարեւան 82-ամյա տատիկը չի արձագանքում դռան թակոցներին: Դեպքի վայր մեկնած փրկարարները պարզում են, որ տատիկը մի պապիկի հետ է եւ պարզապես չի ցանկացել բացել դուռը:
- Ես ու հայրս վիճում ենք, չե՞ք ասի, ինչպես է ավարտվել Հայաստան-Բուլղարիա ֆուտբոլային խաղը: Փրկարարները պատասխանում են՝ 2:1 հօգուտ Հայաստանի:
- Մեր բնակարանում օձ կա: Դեպքի վայր մեկնած փրկարարները բնակարանում օձ չեն հայտնաբերում եւ հեռանում են: Քիչ անց նույն մարդուց նոր ահազանգ. մեր բնակարանում մուկ է եղել, որը հիմա չկա, հավանաբար օձը կերել է, ուրեմն օձը մեր տանն է: Եկեք եւ գտեք:
- Բնակարանի դուռը փակվել է: Դեպքի վայր հասած փրկարարները տեղեկացնում են, որ պետք է էլեկտրական սղոցով կտրեն փականը: Քաղաքացին զարմանում է. մեր տան բանալին չունե՞ք:
- Ամուսինս ինձ ծեծել է տան բակում ցանած թմրանյութն արմատախիլ անելու համար: Փրկարարներն ահազանգը փոխանցում են ոստիկանության հերթապահին, որն ասում է. «Ով էլ լիներ՝ կծեծեր»:
- Մեր շենքի մի բնակիչ մեկ օր է՝ չի արձագանքում դռան թակոցներին եւ հեռախոսազանգերին: Փրկարարները բացում են դուռը, հայտնաբերում քաղաքացու դին եւ հայտնում ոստիկանությանը: «Մահացա՞ծ է, թե ոչ»,- դիակի մասին հարցնում է ոստիկանը:
- Երեք օր առաջ ԱԺ ընտրությունների թեմայով վիճել եմ կնոջս հետ, նա գնացել է տնից, ոչ մի կերպ չեմ կարողանում գտնել: Օգնեք:
- Հարեւանիս լվացքի մեքենայի ձայնը խանգարում է, եկեք ապամոնտաժեք:
- Հիմա ուժեղ քամի է, եւ մեր պատուհանները կարող են վնասվել: Դադարեցրեք քամին:
- Կարո՞ղ եք հստակ ասել՝ եթե աշխարհի վերջն է, Ամանորի սեղան չգցեմ, ծախս չանեմ:
- Կարո՞ղ եք ասել՝ դեկտեմբերի 30-ին եւ 31-ին բանկերն աշխատո՞ւմ են:
- Այցելել եմ մի խմբագրություն, աշխատողները, չիմանալով իմ մասին, դուռը փակել են վրաս, կարո՞ղ եք դուռը բացել: Փրկարարները կապ են հաստատել գրասենյակի ղեկավարի հետ, նա մոտեցել եւ բացել է դուռը:
- Իմ երեխայի դասարանցի այլ երեխայի մայր իմ երեխային ասել է «սեւ բլոճ»: Կարո՞ղ եմ դիմել ոստիկանություն:
- Երեխաս վաղը մաթեմատիկայից ստուգողական գրավոր է գրելու, բայց խնդիրը չի կարողանում լուծել, կարո՞ղ եք օգնել: Մաթեմատիկական կրթություն ունեցող փրկարարը լուծում է խնդիրն ու թելադրում ծնողին, պայմանով, որ նա եւ երեխան լրջորեն կզբաղվեն մաթեմատիկայով:
Արամ ԶԱՔԱՐՅԱՆ
Լուսանկարը վերցված է համացանցից
