Անցած շաբաթ եղանակային պայմանները, կարծես թե, բարենպաստ էին, երթեւեկության խաթարման դեպքերը՝ քիչ։ Այդուհանդերձ մարզերում ծավալված առաջին օգնության փրկարարական հենակետերը շարունակել են աշխատել նույն ռեժիմով։
Շիրակի մարզի Վարդաղբյուրի հենակետը ստացել է հինգ ահազանգ։ Աշոցքի հրշեջ-փրկարարական ջոկատի հերթափոխն օգնության է հասել արգելափակման մեջ հայտնված 15 քաղաքացու, որոնցից 2-ը՝ կին, 1-ը՝ երեխա։ Արդեն մի քանի օր է՝ ձնաբուքը դադարել է։
Արագածոտնի մարզի Քուչակի հենակետը սպասարկել է արգելափակման 6 դեպք, օգնություն է ցուցաբերվել 10 մարդու։
Վարդենյաց լեռնանցք տանող ճանապարհին ծավալված հենակետում Մարտունու ՀՓՋ-ի փրկարարները երկու ելք են կատարել, արգելափակումից դուրս է բերվել երկու մեքենա։
Վայոց ձորի մարզում՝ Երեւան-Մեղրի միջպետական ճանապարհի 161-րդ կիլոմետրում գտնվող հենակետը 4 ահազանգ է ստացել, որոնցից երկուսը՝ արգելափակման, երկուսը՝ ճանապարհատրանսպորտային պատահարի եւ քաղաքացուն օգնելու վերաբերյալ։ Հինգ քաղաքացուց երեքն առժամանակ հանգրվանել են հենակետում։
Սյունիքի մարզի Աղվանիի հենակետն արգելափակումից դուրս է բերել 22, Վերին Խոտանանի հենակետը՝ 2, Շինուհայրի հենակետը՝ 3 մեքենա։ Սյունիքում այժմ արեւոտ եղանակ է։
Անի ԱՆՏՈՆՅԱՆ
