Միավորված ազգերի կազմակերպության զարգացման ծրագրերի եւ Օքսֆորդի համալսարանի համատեղ ուժերով, աշխարհի ավելի քան 50 երկրում կլիմայի փոփոխությունների վերաբերյալ հարցվել է 1,2 միլիոն մարդ, այդ թվում մինչեւ 18 տարեկան անձինք: Մինչեւ 18 տարեկան քաղաքացին առայժմ չունի սեփական երկրի իշխանության ձեւավորմանը՝ ընտրությանը մասնակցելու, այլ խոսքով՝ որոշումների կայացման վրա ազդելու իրավունք եւ լծակ, բայց ապագան հենց նրանցն է եւ նրանց ձայնն այսօր լսելը կարեւոր է: Նման լայնամասշտաբ հարցում իրականացվում է առաջին անգամ: Այս տարվա նոյեմբերին Գլազգո քաղաքում (Միացյալ թագավորություն, Շոտլադիա) անցկացվելու է կլիմայի վերաբերյալ ՄԱԿ-ի գագաթաժողովը: Այս հարցման արդյունքը կդառնա ուղենիշ: Բնակչության բոլոր շերտերին ընդգրկելու համար հարցման նորարարական մեթոդներ են կիրառվել: Մասնավորաբար, քանի որ երիտասարդներն այսօր ավելի շատ իրենց հեռախոսի մեջ են՝ վիրտուալ իրականությունում, հարցման համար հատուկ բջջային հավելված-խաղ է մշակվել:
Հարցման արդյունքների համաձայն, մարդիկ ցանկանում են տեսնել կլիմայի փոփոխությունների դեմ պայքարի ավելի լայն ծրագրեր, հարցվածների 64 տոկոսը կողմ է կլիմայի դեմ փոփոխությունների պայքարին եւ այդ փոփոխությունները որակում է արտակարգ իրավիճակ: Հարցման հեղինակները օրինաչափություն են արձանագրել. մարդիկ առաջարկում են կլիմայի փոփոխությունների դեմ այնպիսի քայլեր, որոնք պետք են իրենց երկրին: Էներգետիկ ոլորտում շատ արտանետումներ ունեցող երկրների քաղաքացիներն առաջարկում են մեծացնել վերականգնվող էներգետիկայի ծավալները: Քիչ անտառներ ունեցող ու հողի որակից տուժող երկրներում նախապատվությունը տրվել է անտառների եւ հողի պարտադիր պաշտպանությանը: Խիտ բնակեցված եւ հետեւաբար մեքենաներով առատ երկրներում առաջարկել են մեծացնել մաքուր՝ էլեկտրական մեքենաների եւ հեծանիվների թիվը եւ այլն:
Հարցվողը կարող էր կլիմայի փոփոխությունների դեմ պայքարի մի քանի տարբերակ նշել: Ըստ այդմ, առավել կարեւորվել է անտառների եւ հողի պաշտպանությունը՝ 54 տոկոս, արեւային, քամու եւ ընդհանրապես վերականգնվող էներգիայի անցնելը՝ 53 տոկոս, խելացի գյուղատնտեսությունը՝ 52 տոկոս, կանաչ ներդրումները՝ 50 տոկոս:
Անկախ երկրի զարգացվածության մակարդակից հարցվածների ավելի քան 82 տոկոսն ասել է, որ կլիմայի փոփոխությունների, դրանցից ծնվող արտակարգ իրավիճակների մասին լսել է կրթական հաստատություն հաճախելիս: Սա հարցման երկրորդային արդյունք է: Եթե ճիշտ կրթություն կազմակերպվի, բնապահպանական խնդիրները կարեւորող, բնության հետ հաշտ ապրող քաղաքացիների հասարակություն կունենանք բոլոր երկրներում:
Հրապարակման պատրաստեց Արամ ԶԱՔԱՐՅԱՆԸ
