Անցած շաբաթ ՀՀ արտակարգ իրավիճակների նախարարության փրկարար ծառայության ստորաբաժանումները արտակարգ իրավիճակների, դեպքերի ու պատահարների վերաբերյալ 400 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիա Ջուր», էլցանց, գազի վթարային ծառայություն, կանաչապատման ծառայություն, ոստիկանություն եւ այլն:
Գրանցվել է 133 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, աղբ, ջերմահարվել են պտղատու եւ դեկորատիվ ծառեր: Գրանցվել է նաեւ հրդեհի 15 կեղծ կանչ:
Փրկարարները 136 կենցաղային կանչ են ստացել, որից մոտ 90 փակ դուռ բացելու վերաբերյալ: Վատառողջ, ծանրաքաշ, սակավաշարժ քաղաքացուն բնակարանից իջեցնելու, բնակարան բարձրացնելու կամ բնակարանում տեղից տեղ տեղափոխելու կանչեր են սպասարկվել Երեւանի Կենտրոն, Դավիթաշեն, Արաբկիր, Նոր Նորք, Աջափնյակ վարչական շրջաններում, Արմավիրում, Կոտայքում: Տարբեր վայրերում արգելափակված (դիտահոր, վերելակի հորան, նկուղ, տանիք, շենքի օդատար-ծխատար, մեքենայի շարժիչի տակ, ջրանցք եւ այլն) մի շարք կենդանիներ են ազատվել: Բնակավայրերի տարբեր մասերում՝ փողոցներ, բակեր, բնակիչներին անհանգստացնող շներին եւ կատուներին փրկարարները հեռացրել են անվտանգ տարածք: Բնակարաններում կամ այլ վայրերում օձ նկատելու վերաբերյալ մեկ ահազանգ է ստացվել, սակայն օձ չի հայտնաբերվել: Արգելափակված երկու մեքենա է հանվել երթեւեկելի հատված, անվտանգ տարածք է տեղափոխվել երկու մարդ:
Այլ կանչեր. Լոռու փրկարարներն ահազանգ են ստացել, որ Ջիլիզա-Վրաստանի սահման ճանապարհին՝ «Ռսի Թալա» կոչվող հանդամասում, հայտնաբերվել է ծառից կախված արկղ։ Դեպքի վայր մեկնելուն զուգահեռ փրկարարներն ահազանգը փոխանցել են Զինված ուժերի ինժեներական ծառայությանը: Վերջինիս մասնագետները բացել են արկղը եւ հայտնաբերել էլեկտրոնային սարքավորում:
Անցած շաբաթ փրկարարները դպրոցներում, մանկապարտեզներում եւ այլ հաստատություններում կազմակերպել են «Հրդեհաշիջումը դպրոցում», «Հրդեհաշիջման աշխատանքների կազմակերպումը եւ իրականացումը», «Հրդեհաշիջման աշխատանքների կազմակերպումը եւ իրականացումը ՀԱԷԿ-ի թունելներում», «Հրդեհաշիջման աշխատանքների կազմակերպումը եւ իրականացումը մանկապարտեզում», «Հրդեհաշիջման աշխատանքների կազմակերպումը եւ իրականացումը բազմաբնակարան շենքում», «Հրդեհաշիջման աշխատանքների կազմակերպումը գազալցակայաններում» եւ այլ թեմաներով ուսումնավարժանքներ եւ դասընթացներ:
