Անցած շաբաթ ՀՀ արտակարգ իրավիճակների նախարարության փրկարար ծառայության ստորաբաժանումները արտակարգ իրավիճակների, դեպքերի ու պատահարների վերաբերյալ 433 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիա Ջուր», էլցանց, գազի վթարային ծառայություն, կանաչապատման ծառայություն, ոստիկանություն եւ այլն:
Գրանցվել է 150 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, աղբ, ջերմահարվել են պտղատու եւ դեկորատիվ ծառեր: Գրանցվել է նաեւ հրդեհի 14 կեղծ կանչ:
Փրկարարները 146 կենցաղային կանչ են ստացել, որից մոտ 100-ը փակ դուռ բացելու վերաբերյալ: Վատառողջ, ծանրաքաշ, սակավաշարժ քաղաքացուն բնակարանից իջեցնելու, բնակարան բարձրացնելու կամ բնակարանում տեղից տեղ տեղափոխելու կանչեր են սպասարկվել Երեւանի Աջափնյակ, Արաբկիր, Դավիթաշեն, Շենգավիթ, Նոր Նորք, Քանաքեռ-Զեյթուն, Կենտրոն վարչական շրջաններում, Շիրակում, Լոռիում: Տարբեր վայրերում արգելափակված (դիտահոր, վերելակի հորան, նկուղ, տանիք, շենքի օդատար-ծխատար, մեքենայի շարժիչի տակ, ջրանցք եւ այլն) մի շարք կենդանիներ են ազատվել: Բնակավայրերի տարբեր մասերում՝ փողոցներ, բակեր, բնակիչներին անհանգստացնող շներին եւ կատուներին փրկարարները հեռացրել են անվտանգ տարածք: Բնակարաններում կամ այլ վայրերում օձ նկատելու վերաբերյալ 5 ահազանգ է ստացվել: Օձ հայտնաբերվել եւ անվտանգ տարածք է տեղափոխվել 3 դեպքում: Արգելափակված 2 մեքենա է հանվել երթեւեկելի հատված, անվտանգ տարածք է տեղափոխվել 2 մարդ:
Այլ կանչեր. Արարատի փրկարարները ահազանգ են ստացել, կորել է Ազատավան գյուղի հիշողության կորստով տառապող 78-ամյա մի բնակչուհի: Փրկարարներն ու գյուղի բնակիչները տատիկին գտել են նույն մարզի Ոստան գյուղում եւ ուղեկցել են իր բնակության վայր: Լոռվա փրկարարներն ահազանգ են ստացել, որ Հարթագյուղի մատույցներում գտնվող «Սուրբ Հովհաննես» մատուռ տանող ճանապարհին քաղաքացու ոտքը կոտրվել է, սարալանջից իջեցնելու եւ շտապօգնության ավտոմեքենային մոտեցնելու համար անհրաժեշտ է փրկարարների օգնությունը: Հրշեջ-փրկարարները 59-ամյա կնոջը պատգարակով մոտեցրել են շտապօգնության ավտոմեքենային: Սյունիքի փրկարարներն ահազանգ են ստացել, որ Քարահունջ գյուղում խոշոր եղջերավոր անասունը ժայռից կախվել է, հանելու համար անհրաժեշտ է օգնություն: Հրշեջ-փրկարարները ժայռից իջեցրել են կենդանուն:
Անցած շաբաթ փրկարարները դպրոցներում, մանկապարտեզներում եւ այլ հաստատություններում կազմակերպել են «Հրդեհաշիջման աշխատանքների իրականացում ու տարհանում», «Հրդեհաշիջման եւ վթարավերականգնողական աշխատանքների իրականացումը նավթամթերքների պահեստներում» եւ այլ թեմաներով ուսումնավարժանքներ եւ դասընթացներ:
