Ռուս-Հայկական մարդասիրական արձագանքման կենտրոնի տրամադրած նոր փրկարարական գույքն ու մեքենաները անվտանգ շահագործելու համար վերապատրաստման դասընթաց են անցել Արագածոտնի մարզի Ապարան և Աշտարակ քաղաքների հրշեջ-փրկարարական ջոկատների ծառայողները:
Արագածոտնի մարզային փրկարարական վարչության Ճգնաժամային կառավարման կենտրոնի պետ, փ/ծ փոխգնդապետ Հրայր Դարբինյանի հաղորդմամբ՝ հիմնականում վթարավերականգնողական և փրկարարական աշխատանքների համար նախատեսված 800 լիտր տարողությամբ ամենագնացը կտնօրինի Ապարանի ջոկատը՝ պայմանավորված տարածաշրջանի առանձնահատկություններով՝ լեռնային գոգավորություններ, խիստ ձնաբուք։
3,5 տոննա տարողությամբ հրշեջ-մեքենան և բազմաֆունկցիոնալ հիդրավլիկ գործիքները կտրամադրվեն Աշտարակի ջոկատին։ Արագածոտնի փրկարարները ստացել են նաեւ հզոր գեներատորներ և տուժածի որոնողական սարք, որն արձագանքում է ձայնային ալիքներին։
Ստացված գույք-սարքավորումներն արդեն գործարկվում են։
Անի ԱՆՏՈՆՅԱՆ
