Տեղեկացրել ենք,որ Արտակարգ իրավիճակների նախարարության թանգարանում բացված ԱԻՆ աշխատակիցների հեղինակած աշխատանքների ցուցադրությունում ներկայացված են եղել նաեւ ԱԻՆ ճգնաժամային կառավարման պետական ակադեմիայի հաշվապահ Քրիստինե Առաքելյանի ձեռագործ տիկնիկները: Քրիստինեն պատվոգիր է ստացել:
«Դիմահարդարման արվեստին ծանոթանալու եւ սովորելու ցանկությունից է ծնվել այս ամենը: Որոշեցի ինքնուրույն ուսումնասիրել: 2016 թվականն էր», — մեզ հետ զրույցում ասաց Քրիստինեն:
Մասնագիտական գրականության ընթերցումից եւ համացանցային որոնումների՝ տեսանյութերի դիտումներից հետո Քրիստինեն սկսել է նկարչություն ուսումնասիրել: «Ասում են ամենադժվարը աչք նկարելն է: Սկսեցի աչք նկարելուց: Լավ ստացվեց: Ոգեւորվեցի, դեմք նկարեցի, լավ ստացվեց ու էլի ոգեւորվեցի: Տեսանյութերի մեջ պատահեցի կտորից տիկնիկ պատրաստելու հմտությունների մասին մի նյութ, նայեցի ու որոշեցի փորձել: Առաջին տիկնիկս պատրաստել եմ բացառապես ձեռքով՝ առանց կարի մեքենայի», — հիշեց Քրիստինեն:
Առաջին ձեռագործ տիկնիկը հիմա Ավստրալիայում է: Քրիստինեի ընկերուհին Եղեգնաձոր քաղաքում ձեռքի աշխատանք հուշանվերների վաճառքով է զբաղվում, տիկնիկը հավանել, տարել է: «Այդպես իմ տիկնիկը հայտնվեց բազմաթիվ այլ հուշանվերների կողքին: Հետո ընկերուհիս ինձ տեղեկացրեց, որ ավստրալիացի մի զբոսաշրջիկ գնել է տիկնիկս: Այդ օրը չեմ մոռանա՝ 2017 թվականի սեպտեմբերի 18-ն էր: Այս ոգեւորությունը հիմք դարձավ, որ սկսեմ նոր տիկնիկներ պատրաստել: Արդեն կարի մեքենայի օգնությամբ: Հիմա արդեն 15-16 տիկնիկ եմ պատրաստել: Աշխատանքներովս հետաքրքրվողները կարող են միանալ Facebook սոցկայքում իմ էջին https://www.facebook.com/katelandcom/»:
ԱԻՆ-ում բացված ցուցահանդեսից հետո եւս 2 տիկնիկ է վաճառվել: Ամեն անգամ տիկնիկ պատրաստելիս Քրիստինեն նախապես որոշում է ինչպիսին պիտի լինի տիկնիկը, սակայն ընթացքում փոփոխություններ լինում են: Դեռ չի փորձել կոնկրետ մարդու կրկնօրինակ ստանալ, բայց բոլոր տիկնիկներին էլ նմանեցնում է իր ծանոթներից որեւէ մեկին: «Տիկնիկներն ավելի շատ աղջիկ են, դե իրենք մի քիչ թիթիզ են: Աշխատում եմ մռայլ գույներ չօգտագործել ու տխուր կերպարներ չստեղծել: Սրանք բարի տիկնիկներ են բարի մարդկանց համար»,- իր տիկնիկներին այսպես ներկայացրեց Քրիստինեն:
Արամ ԶԱՔԱՐՅԱՆ
Լուսանկարները՝ Վահրամ ԱՎՈՅԱՆԻ