Հուլիսի 25-31-ն ընկած ժամանակահատվածում Արցախի Հանրապետության ներքին գործերի նախարարության արտակարգ իրավիճակների պետական ծառայության 911 ճգնաժամային կառավարման կենտրոնը գրանցել է 576 ահազանգ, որից 58-ը՝ արտակարգ դեպք-պատահարների վերաբերյալ: Տեխնածին բնույթի կանչերը 10-ն էին, սոցիալ-կենցաղայինը՝ 9:
Զգալիորեն նվազել է հրդեհների քանակը. գրանցված հրդեհի 4 դեպքից 3-ը բռնկվել է չոր խոտածածկ տարածքներում, մեկը՝ ավտոմեքենայում: Ծառայության կենտրոնական, շրջանային ստորաբաժանումները եւ հրշեջ հենակետերում տեղակայված մարտական հաշվարկները օպերատիվորեն իրականացրել են հրդեհաշիջման աշխատանքներ:
Փրկարարները բացել են 3 փակ դուռ, 4 քաղաքացի տեղափոխվել է բժշկական հաստատություններ: Գրանցվել է այլ բնույթի եւս 4 կանչ:
Ճանապարհատրանսպորտային պատահարների վերաբերյալ նշված ժամանակահատվածում ստացվել է մեկ ահազանգ, տուժած քաղաքացիներին ցուցաբերվել է առաջին օգնություն:
3 ահազանգ վերաբերել է օձի հայտնաբերմանը: Թունավոր սողունները տեղափոխվել են անվտանգ տարածք:
ԱԻ պետական ծառայության սակրավորական խմբերը գործընկեր կառույցների հետ իրականացրել են չպայթած զինամթերքի հայտնաբերման աշխատանքներ:
Ընդհանուր առմամբ՝ շաբաթվա ընթացքում վնասազերծվել է 61 հրթիռ, հրթիռակասետային 3 ռումբ, ականանետի 67 ական եւ գնդիկաբեկորային 4 ավիառումբ:
Բնակչության անվտանգության ապահովման նպատակով ԱԻ պետական ծառայությունն իրականացնում է շուրջօրյա ուժեղացված ծառայություն. ցանկացած արտակարգ իրավիճակում զանգահարեք 911, 101, 112 հեռախոսահամարներով:
Արցախի ՆԳՆ արտակարգ իրավիճակների պետական ծառայություն