Այսօր, Հայաստանի արտակարգ իրավիճակների նախարարությունում ստորագրվեց «Աղետների ռիսկի նվազեցման նպատակով ճգնաժամային հաղորդակցության եւ հանրային իրազեկման բարելավման ծրագրի» երկրորդ փուլի պայմանագիրը: Սա հայ-ճապոնական համատեղ ծրագիր է, մեկնարկել է 2019 թվականի փետրվարին, պետք է ավարտվեր 2022-ի հունիսին, սակայն կորոնավիրուսի համաճարակի պատճառով ժամկետների փոփոխություն է եղել: Ծրագիրը կավարտվի 2023-ի հունվարին: Հայկական կողմից ստորագրողը ԱԻ առաջին փոխնախարար Արմեն Փամբուխչյանն էր, ճապոնական կողմից` Ճապոնիայի միջազգային համագործակցության գործակալության՝ JICA, Վրաստանի գրասենյակի մշտական ներկայացուցիչ Էջիրի Յուկիհիկոն եւ ծրագրի համակարգող Քոիչի Շիվակուն:
Ստորագրումից առաջ, ծրագրի միասնական համակարգող հանձնաժողովն ամփոփեց առաջին փուլի արդյունքները: Արմեն Փամբուխչյանը նշեց, որ արտակարգ իրավիճակների ոլորտում հայ-ճապոնական համագործակցությունը տարաբնույթ է՝ գույքի, սարքավորումների տրամադրումից մինչեւ մասնագետների վերապատրաստում: Էջիրի Յուկիհիկոն էլ ուրախությամբ արձանագրեց, որ ԱԻՆ աշխատակիցները ակտիվ կիրառում են վերապատրաստման ծրագրով ստացած գիտելիքները:
«Աղետների ռիսկի նվազեցման նպատակով ճգնաժամային հաղորդակցության եւ հանրային իրազեկման բարելավման ծրագրով» անցկացվել է հայ մասնագետների երեք վերապատրաստում՝ երկուսը Հայաստանում, մեկը՝ Ճապոնիայում, մշակվել է աղետների վերաբերյալ բնակչությանը, պաշտոնատար անձանց լրատվամիջոցներին ժամանակին եւ ճիշտ տեղեկություններ հաղորդելու գործողությունների ստանդարտ ընթացակարգի նախագիծ եւ լրատվամիջոցների համար աղետների լուսաբանման ուղեցույցի նախագիծ: Անցկացվել է լրագրողական աշխատանքների քարոզարշավ:
Գործողությունների ստանդարտ ընթացակարգի ընդունումը կբացառի հանրային իրազեկման հնարավոր խոչընդոտները, իսկ աղետների լուսաբանման ուղեցույցը ներառում է հարցերի լայն շրջանակ՝ աղետի գոտում լրագրողի եւ տուժած քաղաքացու իրավունքներից մինչեւ լրագրողների վերապատրաստում: «Աղետների ռիսկի նվազեցման նպատակով ճգնաժամային հաղորդակցության եւ հանրային իրազեկման բարելավման ծրագրի» երկրորդ փուլում այս նախագծերը կհաստատվեն:
Արամ ԶԱՔԱՐՅԱՆ
Հ.Գ. Աղետների ռիսկի նվազեցման նպատակով ճգնաժամային հաղորդակցության եւ հանրային իրազեկման բարելավման ծրագրի» մասին կարդացեք նաեւ.
Մարդը չի կարող արձագանքել նրան, ինչը չի պատկերացնում
