Ճապոնիայի կառավարությունը՝ Ճապոնիայի միջազգային համագործակցության գործակալությունը (JICA) 2019 թվականին Հայաստանի արտակարգ իրավիճակների նախարարությանը կտրամադրի 40 միավոր հրշեջ–փրկարարական մեքենա, որոնք կտրամադրվեն մարզերի հրշեջ-փրկարարական ջոկատներին: 18 մեքենա արդեն Հայաստանում է: Հայ-ճապոնական պայմանավորվածության համաձայն, նախքան մեքենաների շահագործումը ճապոնացի մասնագետները կվերապատրաստեն մեր փրկարարներին:
Ապրիլի 18-մայիսի 25 ժամանակահատվածում ՀՀ ԱԻՆ ճգնաժամային կառավարման պետական ակադեմայի «Լուսակերտ» գործնական պարապմունքների կենտրոնում անցկացվում են հրշեջ ավտոմեքենաների շահագործման եւ սպասարկման վերաբերյալ դասընթացներ Լոռու, Սյունիքի, Շիրակի մարզերի փրկարարների համար: Մասնակցում է 42 փրկարար՝ վարորդ-մեխանիկից մինչեւ ջոկատի հրամանատար:
Դասընթացները վարում են ճապոնացի մասնագետները, կազմակերպչական աշխատանքների պատասխանատուներն են ՀՀ ԱԻՆ փրկարար ծառայության թիկունքի եւ նյութատեխնիկական ապահովման, փրկարար ուժերի եւ այլ վարչությունների, ճգնաժամային կառավարման պետական ակադեմիայի ներկայացուցիչները:
Փրկարարներն ուսումնասիրում են ճապոնական արտադրության հրշեջ-ավտոսանդուղքները, ավտոբաքերը, շարժական արհեստանոցները:
Արամ ԶԱՔԱՐՅԱՆ
Լուսանկարները՝ Վահրամ ԱՎՈՅԱՆԻ
