Որ խեղդվելու հավանականությունը նվազի
Ջրում չխեղդվելու ձեր շանսերը մի քանի անգամ կմեծանան, եթե լողալ գիտեք, կարող եք առանց կողմնակի միջամտության մնալ ջրի երեսին: Բացի ջրային պատահարների հավանականությունը նվազեցնող միջոցից՝ լողը նաեւ առողջարար է: Մանուկ հասակում լողի դասերը դառնում են երեխայի համաչափ զարգացման լուրջ խթան եւ դրականորեն ազդում ձեր բալիկի մարմնի բոլոր համակարգերի վրա: Գոնե մեկ տարի կանոնավոր լողի դասերի հաճախած երեխաները լողի չգնացած փոքրիկների համեմատ հազվադեպ են հիվանդանում: Մինչեւ 7 տարեկան երեխաների համար կարելի է լողի դասեր կազմակերպել հենց տան լոգարանում` շաբաթական երեք անգամ: Ջրի ջերմաստիճանը` մոտ 40 աստիճան, եղեք շատ ուշադիր եւ զգույշ: Փոքրիկը պետք է հաճույք ստանա: Եթե երեխան լալիս է կամ հոգնածության նշաններ է ցույց տալիս, անմիջապես դադարեցրեք դասը: Նախքան դասերին անցնելը ձեր ընտանեկան կամ տեղամասային բժշկի հետ խորհրդակցեք, համոզվեք, որ երեխան մաշկային կամ այլ խնդիրներ չունի, եւ հաճախակի ջրային լոգանքը նրան հակացուցված չէ: Սկզբում երեխային ջուրն իջեցրեք` նրա մեջքից պահած, կամաց-կամաց թողեք, որ նա ինքնուրույն «թիավարի» ոտքերով եւ ձեռքերով: Երեխային լողալ պետք է սովորեցնել «դանդաղ շտապիր» սկզբունքով` ամեն ինչ հերթով, աստիճանաբար, առանց անիմաստ շտապողականության: Այնպես արեք, որ հանկարծ երեխայի բերանը ջուր չլցվի: Մեկ կում ջուրը վնաս չի տա, բայց երեխան կարող է ջրից վախենալ եւ այլեւս ջուրը չմտնել: Որոշակի տարիքից՝ սովորաբար վեց տարեկանը լրանալուց հետո, երեխային կարելի է ուղարկել լողի մարզադպրոց` պրոֆեսիոնալ մասնագետների «ձեռքի տակ»: