Փրկարարներն ազատել են անձրեւի «պատանդներին»
Անցած յոթ օրում ՀՀ արտակարգ իրավիճակների նախարարության փրկարար ծառայության ստորաբաժանումները արտակարգ իրավիճակների վերաբերյալ մոտ 400 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիաջուր», էլցանց, գազի վթարային ծառայություն, կանաչապատման, սանմաքրման ծառայություն, ոստիկանություն և այլն:
Գրանցվել է մոտ 50 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, ջերմահարվել են պտղատու եւ դեկորատիվ ծառեր: Փակ դուռ բացելու վերաբերյալ էլ 100 կանչ է ստացվել: Վատառողջ, ծանրաքաշ, սակավաշարժ քաղաքացուն բնակարանից իջեցնելու կամ բնակարանում տեղից տեղ տեղափոխելու կանչեր են սպասարկել Երևանի Կենտրոն, Մալաթիա-Սեբաստիա, Նոր Նորք, Ավան, Աջափնյակ, Էրեբունի վարչական շրջանների եւ Կոտայքի փրկարարները: Տարբեր վայրերում արգելափակված (դիտահոր, վերելակի հորան, նկուղ, շենքի օդատար-ծխատար, մեքենայի շարժիչի տակ և այլն) մի շարք կենդանիներ են ազատվել: Գետերի ու լճերի ափերին կամ այլ վայրերում ցեխակույտի մեջ արգելափակված 3 մեքենա է հանվել երթեւեկելի մաս: 35 օձ է հայտաբերվել եւ տեղափոխվել անվտանգ տարածք:
Հունիսի 12-ի երեկոյան Երեւանում տեղացած հորդ անձեւից հետո բազմաթիվ ահազանգեր են ստացվել: Փրկարարներն արձագանքել են բոլոր զանգերին եւ մի դեպքում նկուղային հարկում գտնվող էլեկտրոնիկայի խանութից հեռացրել անձրևաջուր, այլ դեպքում ջրալցված գետնանցումում արգելկափակված մեքենաներն ու ուղեւորներին անվտանգ հեռացրել տարածքից եւ այլն:
Այլ կանչեր. Նոր Նորքի փրկարարներն ահազանգ են ստացել, որ Հովհաննիսյան փողոցի թիվ 22 շենքի տանիքի թիթեղյա ծածկի տակ ագռավ է արգելափակվել: Հրշեջ-փրկարարներն ազատել են ագռավին: Էրեբունու փրկարարներն ահազանգ են ստացել, որ Սարի Թաղի տներից մեկի բակում ոզնին արգելափակվել է երկաթե կառուցատարրերի մեջ: Հրշեջ-փրկարարները ոզնուն դուրս են բերել արգելափակումից: Կոտայքի փրկարարներն ահազանգ են ստացել, որ Մրգաշեն գյուղի սկզբնամասում կովն ընկել է Արզնի-Շամիրամ ջրանցքը: Հրշեջ-փրկարարները ջրանցքից դուրս են բերել կենդանուն: