Ներքին գործերի նախարարության Սեյսմիկ պաշտպանության տարածքային ծառայությունն ամփոփում է փետրվարին կատարած աշխատանքը։
Ըստ պլան-ժամանակացույցի՝ Երեւան քաղաքի, Արմավիրի, Վայոց ձորի, Շիրակի, Լոռու եւ Սյունիքի մարզերի քաղաքների, գյուղական համայնքների բազմաթիվ դպրոցներում իրականացվել են երկրաշարժից պաշտպանվելու վարքականոնի ուսուցում, «Ուսումնական տարհանում» թեմայով վարժանքներ, խաղ-վիկտորինաներ, կազմակերպվել են ճանաչողական այցեր Գառնիի երկրաֆիզիկական դիտարան։
ՍՊՏԾ բնակչության հետ տարվող աշխատանքների վարչության պետ Սերոբ Դարբինյանը նշեց՝ երկրաշարժի վերաբերյալ իրազեկվածության առումով դպրոցները դեռ բավական անելիք ունեն:
Հաճախ հանդիպող խնդիրներն են՝
- Տարհանման համար նախատեսված ազատ, անվտանգ տարածության լիովին կամ մասնակի անհամապատասխանությունը՝ պայմանավորված հարակից բարձրահարկ շինություններով, կցակառույցներով,
- տարհանման համար նախատեսված ազդարարման համակարգի մասնակի բացակայությունը, օրինակ, ոչ լիարժեք ձայնային ազդանշանի հասանելիությունը,
- տարհանման ելքերի ոչ լիարժեք օգտագործումը՝ պայմանավորված դրանց փակ կամ անանցանելի լինելով,
- առաջին հարկում առկա պատուհանների անշարժ երկաթյա ճաղաշարերի առկայությունը։
Նորակառույց սեյսմակայուն դպրոցների դեպքում, Սերոբ Դարբինյանի խոսքով, ծրագիրն այլ է․ հիմնականում շեշտը դրվում է երկրաշարժից պաշտպանվելու վարքականոնի ուսուցման եւ պատսպարման վարժանքների վրա։
«Գրեթե բոլոր դպրոցների ղեկավարներն անվտանգության հարցին լուրջ են մոտենում եւ բաց են համագործակցության համար։ Ուսուցումը կրելու է շարունակական բնույթ»,- ամփոփեց վարչության պետը։
Անի ԱՆՏՈՆՅԱՆ