Սեպտեմբերի 29-ին Հայաստանի կառավարությունը հաստատել է «Հայաստանի Հանրապետության 2023 թվականի պետական բյուջեի մասին» օրենքի նախագիծը, որը սահմանված կարգով կներկայացվի խորհրդարանի հաստատմանը: Նախագծով առաջարկվում է ՀՀ արտակարգ իրավիճակների նախարարությանը հատկացնել 16,451 միլիարդ դրամ: ԱԻՆ-ի այս տարվա բյուջեն 14,205 միլիարդ դրամ էր:
«Հայաստանի Հանրապետության 2023 թվականի պետական բյուջեի մասին» օրենքի նախագծում ներկայացված են նաեւ ծախսերի ուղղությունները.
- Փրկարարական ծառայություններ՝ 13,399 միլիարդ դրամ
- Փրկարարական ծառայողներին եւ փրկարար շներին դեղորայքով ապահովում՝ 923 հազար դրամ
- Տեխնիկական անվտանգության կանոնակարգում՝ 431,645 միլիոն դրամ
- «Նաիրիտ-գործարանի» անվտանգության ապահովում՝ 388,264 միլիոն դրամ
- Պետական եւ տեղական ինքնակառավարման մարմինների ղեկավար անձնակազմի եւ մասնագետների վերապատրաստման կազմակերպում՝ 121,025 միլիոն դրամ
- Սեյսմիկ պաշտպանություն՝ 752,862 միլիոն դրամ
- Արտակարգ իրավիճակներում մարդասիրական աջակցության կազմակերպում՝ 36,357 միլիոն դրամ
- Օտարերկրյա պետությունների ուսումնական հաստատություններ գործուղված փրկարարական ծառայողների ուսուցման կազմակերպում՝ 13,603 միլիոն դրամ
- Եվրամիության կողմից հարավային կովկասի խոցելի տարածքներում երկրաշարժի համակողմանի կառավարման աջակցության միջոցառում՝ 23,250 միլիոն դրամ
- Արտակարգ իրավիճակների նախարարության տեխնիկական հագեցվածության բարելավում՝ 12,370 միլիոն դրամ եւ այլն:
Արամ ԶԱՔԱՐՅԱՆ
