Մարտի 28-ապրիլի 3 ժամանակահատվածում ՀՀ արտակարգ իրավիճակների նախարարության փրկարար ծառայության ստորաբաժանումները արտակարգ իրավիճակների, դեպքերի ու պատահարների վերաբերյալ 559 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիա Ջուր», էլցանց, գազի վթարային ծառայություն, կանաչապատման ծառայություն, ոստիկանություն եւ այլն:
Անցած շաբաթ գրանցվել է 187 հրդեհ՝ այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, աղբ, ջերմահարվել են պտղատու եւ դեկորատիվ ծառեր: Գրանցվել է նաեւ հրդեհի 12 կեղծ ահազանգ:
Անցած շաբաթ փրկարարները 156 կենցաղային կանչ են ստացել, որից ավելի քան 80-ը՝ փակ դուռ բացելու վերաբերյալ: Վատառողջ, ծանրաքաշ, սակավաշարժ քաղաքացուն բնակարանից իջեցնելու, բնակարան բարձրացնելու կամ բնակարանում տեղից տեղ տեղափոխելու կանչեր են սպասարկվել Երեւանի Կենտրոն, Շենգավիթ, Աջափնյակ, Դավիթաշեն, Արաբկիր, Քանաքեռ-Զեյթուն, Նոր նորք վարչական շրջաններում, Կոտայքում, Լոռիում: Տարբեր վայրերում արգելափակված (դիտահոր, վերելակի հորան, նկուղ, տանիք, շենքի օդատար-ծխատար, անձրեւաջրերի հեռացման խողովակ, մեքենայի շարժիչի տակ, ջրանցք եւ այլն) մի շարք կենդանիներ են ազատվել: Բնակավայրերի տարբեր մասերում՝ փողոցներ, բակեր, բնակիչներին անհանգստացնող շներին եւ կատուներին փրկարարները հեռացրել են անվտանգ տարածք: Տարբեր վայրերում, տարբեր պատճառներով արգելափակված 167 մեքենա է հանվել երթեւեկելի հատված, անվտանգ տարածք է տեղափոխվել 461 մարդ:
Անցած շաբաթ փրկարարները տարբեր ուսումնական, առողջապահական հաստատություններում, համայնքապետարաններում, մասնավոր հիմնարկներում կազմակերպել են «Քաղաքացիական պաշտպանության միջոցառումների կազմակերպումը եւ իրականացումը», «Հրդեհաշիջումը եւ տարհանումը ուսումնական հաստատությունում ծագած հերդեհի ժամանակ», «Հրդեհաշիջումը արտադրական ձեռնարկություններում», «Հրդեհաշիջումը էլեկտրական ենթակայանում», «Դպրոցում հրդեհաշիջում, տարհանում եւ առաջին օգնության ցուցաբերում», «Հրդեհաշիջման, տարհանման աշխատանքների կազմակերպումն ու իրականացումը հրդեհապայթյունավտանգ օբյեկտում ծագած հրդեհի դեպքում», «Բնակչության ազդարարում, տարահանում, պատսպարում», «Օդային տագնապի ազդանշանի դեպքում բնակչության պատսպարման կազմակերպումը» եւ այլ թեմաներով ուսումնավարժություններ:
