Հոկտեմբերի 19-26-ն ընկած ժամանակահատվածում Արցախի Հանրապետության Արտակարգ իրավիճակների պետական ծառայության 911 ահազանգման կենտրոնը ստացել է 7000-ից ավելի զանգ, որոնցից 2099-ը` արտակարգ դեպքերի ու պատահարների վերաբերյալ։
Շաբաթվա ընթացքում ստացվել է հրդեհի մասին 13 հաղորդագրություն։ Դրանք հիմնականում առաջացել են ադրբեջանական կողմից խաղաղ բնակավայրերը հրթիռակոծելու արդյունքում: Հրշեջ-փրկարարները հասցրել են ժամանակին արձագանքել բոլոր կանչերին, կատարել հրդեհաշիջում:
Գրանցվել է տեխնածին բնույթի 4 եւ ճանապարհատրանսպորտային պատահարի 2 դեպք: Տուժածները տեղափոխվել են բժշկական հաստատություններ:
Զենք-զինամթերքի հայտնաբերման 29 հաղորդում է ստացվել: Սակրավորական խմբերն արձագանքել են բոլոր կանչերին եւ վնասազերծել դրանք: Չպայթած զենքերի, ականների հայտնաբերման ու ոչնչացման աշխատանքները շարունակական են եւ աշխատատար:
Գրանցվել է բնակչության օգնության 59 կանչ, փրկարարներն ապաստարաններ են հասցրել անհրաժեշտ պարագաներ ու դեղորայք։
Բազմաթիվ զանգեր են ստացվել օտարերկրյա լրագրողներից, որոնք այս օրերին աշխատում են Արցախում: Փրկարարները նրանց ապահովել են սննդով ու տաք հագուստով:
Այլ կանչեր
Տարեց կինը զանգահարել է Ճգնաժամային կառավարման կենտրոն եւ հարցրել՝ ինչպես կարելի է նկուղային պայմաններում ջեռոցում տնական հավ պատրաստել։ Փրկարարներն օգնել են կնոջը՝ առաջարկելով ջոկատի հարազատ բաղադրատոմսը։