Անցած շաբաթ ՀՀ արտակարգ իրավիճակների նախարարության փրկարար ծառայության ստորաբաժանումները արտակարգ իրավիճակների, դեպքերի ու պատահարների վերաբերյալ 374 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիա Ջուր», «Սանիթեք», էլցանց, գազի վթարային ծառայություն, կանաչապատման ծառայություն, ոստիկանություն եւ այլն:
Գրանցվել է 74 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, աղբ, ջերմահարվել են պտղատու եւ դեկորատիվ ծառեր: Գրանցվել է նաեւ հրդեհի 21 կեղծ կանչ:
Փրկարարները 149 կենցաղային կանչ են ստացել, որից 90-ը փակ դուռ բացելու վերաբերյալ: Վատառողջ, ծանրաքաշ, սակավաշարժ քաղաքացուն բնակարանից իջեցնելու, բնակարան բարձրացնելու կամ բնակարանում տեղից տեղ տեղափոխելու կանչեր են սպասարկվել Երեւանի Աջափնյակ, Մալաթիա-Սեբաստիա, Շենգավիթ, Նոր Նորք վարչական շրջաններում եւ Շիրակում: Տարբեր վայրերում արգելափակված (դիտահոր, վերելակի հորան, նկուղ, տանիք, շենքի օդատար-ծխատար, մեքենայի շարժիչի տակ, ջրանցք եւ այլն) մի շարք կենդանիներ են ազատվել: Բնակավայրերի տարբեր մասերում՝ փողոցներ, բակեր, բնակիչներին անհանգստացնող շներին եւ կատուներին փրկարարները հեռացրել են անվտանգ տարածք: Տարբեր վայրերում արգելափակված 3 մեքենա է հանվել երթեւեկելի հատված, անվտանգ տարածք է տեղափոխվել 3 մարդ: 16 օձ է հայտնաբերվել եւ տեղափոխվել անվտանգ տարածք:
Այլ կանչեր. Կենտրոնի փրկարարներնը կեսգիշերն անց ահազանգ են ստացել, որ Երվանդ Քոչարի փողոցի շենքերից մեկի մի բնակչի մատանին մնացել է մատին, դուրս բերելու համար անհրաժեշտ է փրկարարների օգնությունը: Փրկարարները մատանին դուրս են բերել կնոջ մատից:
Շիրակի փրկարարներն ահազանգ են ստացել, որ Ազատան գյուղի լճի մոտակայքում հայտնաբերվել է արկանման առարկա: Պարզվել է, լճի մոտակայքում հայտնաբերվել է 82մմ տրամաչափի հրետանային, կորոզիայի ենթարկված արկ՝ առանց պայթուցիչի, որը տեղափոխման համար վտանգ չի ներկայացնում: Արկը տեղափոխվել է ոստիկանության Ախուրյանի բաժին:
Անցած շաբաթ փրկարարները դպրոցներում եւ այլ հաստատություններում կազմակերպել են «Հրդեհաշիջման աշխատանքների կազմակերպումը եւ իրականացումը», «Աղետների ռիսկերի նվազեցման պլանների կիրառելությունը» եւ այլ թեմաներով ուումնավարժանքներ եւ դասընթացներ:
