Անցած շաբաթ ՀՀ արտակարգ իրավիճակների նախարարության փրկարար ծառայության ստորաբաժանումները արտակարգ իրավիճակների վերաբերյալ ավելի քան 400 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիա Ջուր», «Սանիթեք», էլցանց, գազի վթարային ծառայություն, կանաչապատման ծառայություն, ոստիկանություն եւ այլն:
Դեռ մեծ է հրդեհների քանակը: Գրանցվել է մոտ 180 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, ջերմահարվել են պտղատու եւ դեկորատիվ ծառեր: Բուսածածկ տարածքների խոշոր հրդեհներներից են. Արարատիր մարզի Ուրցալանջ, Լուսաշող եւ Վարդաշատ համայնքների մոտակա սարերում՝ 600 հա, Կոտայքի մարզի Երեւան-Սեւան ավտոճանապարհի 27-րդ կմ-ի մոտակայքում՝ 60 հա, նույն մարզի Հրազդան քաղաքի Վանատուր թաղամասի մոտակա սարալանջին՝ մոտ 28 հա: Այս հրդեհի մարմանը մասնակցել են ազատ հերթափոխից 27 հրշեջ-փրկարար եւ անտառտնտեսության 8 աշխատակից:
Փակ դուռ բացելու վերաբերյալ էլ 85 կանչ է ստացվել: Վատառողջ, ծանրաքաշ, սակավաշարժ քաղաքացուն բնակարանից իջեցնելու, բնակարան բարձրացնելու կամ բնակարանում տեղից տեղ տեղափոխելու կանչեր են սպասարկել Երեւանի Արաբկիր, Նոր Նորք, Կենտրոն վարչական շրջանի եւ Գեղարքունիքի ու Շիրակի փրկարարները: Տարբեր վայրերում արգելափակված (դիտահոր, վերելակի հորան, նկուղ, տանիք, շենքի օդատար-ծխատար, մեքենայի շարժիչի տակ եւ այլն) մի շարք կենդանիներ են ազատվել: Բնակավայրերի տարբեր մասերում՝ փողոցներ, բակեր, բնակիչներին անհանգստացնող շներին եւ կատուներին փրկարարները հեռացրել են անվտանգ տարածք: 5 օձ է հայտնաբերվել եւ տեղափոխվել անվտանգ տարածք: Տարբեր տարածքներում արգելափակված մեքենաներ են դուրս բերվել երթեւեկելի հատված:
Այլ կանչեր. Աջափնյակի փրկարարներն ահազանգ են ստացել, որ թիվ 155 դպրոցում ռումբ է տեղադրված. անհրաժեշտ է փրկարարների օգնությունը: Ահազանգողի հեռախոսահամարով հետադարձ զանգ է կատարվել, մի երեխա պատասխանել է, որ իր հեռախոսից այլ երեխաներ են զանգահարել, նման դեպք չկա: Ամեն դեպքում հրշեջ-փրկարարները դպրոցից տարահանել են 400 աշակերտ, 74 մանկավարժ եւ 25 սպասարկող անձնակազմ եւ զննել տարածքը: Պայթուցիկ սարք չի հայտնաբերվել: Դավիթաշենի փրկարարներն ուշ գիշերին ահազանգ են ստացել, որ Դավիթաշենի կամրջի ներքեւում գտնվող հետիոտնային անցումում նռնակ կա: Հրշեջ-փրկարարները սահմանազատել են տարածքը, փրկարար ծառայության քաղաքացիական պաշտպանության ուժերի հավաքական կենտրոնի ինժեներական ջոկատի սակրավորական խումբը զննությամբ պարզել է, որ նռնակը ուսումնական է եւ այն հանձնել է ոստիկանությանը: Կոտայքի փրկարարներն ահազանգ են ստացել, որ Նոր Հաճն քաղաքում ջրատարը մարդ է ընկել: Փրկարարները ջրատարից դուրս են բերել 36-ամյա տղամարդուն: Նա հոսպիտալացվել է:
Փրկարարները կազմակերպել են տարբեր թեմաներով վարժանքներ: Այդ մասին առավել մանրամասն՝ այստեղ
