Անցած շաբաթ ՀՀ արտակարգ իրավիճակների նախարարության փրկարար ծառայության ստորաբաժանումները արտակարգ իրավիճակների վերաբերյալ ավելի քան 550 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիա Ջուր», էլցանց, գազի վթարային ծառայություն, կանաչապատման, սանմաքրման ծառայություն, ոստիկանություն եւ այլն:
Բարձր ջերմաստիճանով պայմանավորված մեծ է հրդեհների քանակը: Գրանցվել է մոտ 300 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, ջերմահարվել են պտղատու եւ դեկորատիվ ծառեր: Բուսածածկ տարածքների խոշոր հրդեհներներից են. Սյունիքի մարզ Արեւիս-Թանահատ գյուղերի խաչմերուկում 500 հա, Սրաշեն գյուղում՝ 10 հա, Եղեգ գյուղի մոտակա անտառում՝ 30 հա, Արագածոտն՝ Արագածավան գյուղում՝ 6 հա, Հացաշեն գյուղում՝ 80 հա, Կոտայք Չարենցավան 7 հա, Վայոց ձոր, Գոմք գյուղի մոտակայքում՝ 18 հա, Արարատ, Վեդի-Շաղափ ավտոճանապարհին՝ 15 հա, Գեղարքունիք՝ Վարդաձոր գյուղում՝ 10 հա եւ այլն: Սյունիքի մարզի Բարձրավան գյուղի մատույցների անտառում հրդեհաշիջմանը բացի փրկարարներից մասնակցել է նաեւ անտառտնտեսության 4 աշխատակից եւ ազատ հերթափոխից 3 հրշեջ-փրկարար:
Փակ դուռ բացելու վերաբերյալ էլ 110 կանչ է ստացվել: Վատառողջ, ծանրաքաշ, սակավաշարժ քաղաքացուն բնակարանից իջեցնելու, բնակարան բարձրացնելու կամ բնակարանում տեղից տեղ տեղափոխելու կանչեր են սպասարկել Երեւանի Էրեբունի, Կենտրոն, Նոր Նորք, Դավիթաշեն, Մալաթիա-Սեբաստիա վարչական շրջանների եւ Լոռու փրկարարները: Տարբեր վայրերում արգելափակված (դիտահոր, վերելակի հորան, նկուղ, տանիք, շենքի օդատար-ծխատար, մեքենայի շարժիչի տակ եւ այլն) մի շարք կենդանիներ են ազատվել: Բնակավայրերի տարբեր մասերում՝ փողոցներ, բակեր, բնակիչներին անհանգստացնող շներին եւ կատուներին փրկարարները հեռացրել են անվտանգ տարածք: 6 օձ է հայտնաբերվել եւ տեղափոխվել անվտանգ տարածք: Տարբեր տարածքներում արգելափակված մեքենաներ են դուրս բերվել երթեւեկելի հատված:
Այլ կանչեր. Արաբկիրի փրկարարներն կեսգիշերն անց ահազանգ են ստացել, որ Ադոնցի փողոցի շենքերից մեկում մի բնակարանի դռան բանալին ընկել է վերելակի հորանը, դուռը բացելու համար անհրաժեշտ է փրկարարների օգնությունը: Փրկարարները վերելակի հորանից դուրս են բերել բնակարանի դռան բանալին:
