Անցած շաբաթ ՀՀ արտակարգ իրավիճակների նախարարության փրկարար ծառայության ստորաբաժանումները արտակարգ իրավիճակների վերաբերյալ ավելի քան 450 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիա Ջուր», էլցանց, գազի վթարային ծառայություն, կանաչապատման, սանմաքրման ծառայություն, ոստիկանություն եւ այլն:
Բարձր ջերմաստիճանով պայմանավորված մեծ է հրդեհների քանակը: Գրանցվել է ավելի քան 250 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, ջերմահարվել են պտղատու եւ դեկորատիվ ծառեր: Բուսածածկ տարածքների խոշոր հրդեհներներից են. Կոտայքի մարզ Հրազդան՝ 30 հա, Սյունիք՝ Քարահունջ 40 հա, հրդեհաշիջմանը մասնակցել են 20 զինծառայող, ոստիակնության 5 աշխատակից եւ 10 գյուղի բնակիչ: Երեւան Ծիծեռնակաբերդի խճուղում՝ Հայոց ցեղասպանության զոհերի հուշահամալիրի մոտակայքում՝ 4 հա, «Ռեժինէ» հյուրանոցի մատույցներում՝ 5,5 հա, Արագածոտն Կարմրաշեն 60 հա, Տավուշ Բերդավան 20 հա, Արարատ Լանջանիստ գյուղ 110 հա, Շիրակ Հայկաձոր գյուղում՝ ՌԴ սահմանապահ թիվ N ուղեկալի տարածքում՝ 400 հա, Սյունիք, Վահրավար գյուղի մատույցներում՝ 11 հա, հրդեհաշիջմանը մասնակցել են 19 զինծառայող, «Արեւիկ ազգային պարկի» 18 աշխատակից:
Փակ դուռ բացելու վերաբերյալ էլ 110 կանչ է ստացվել: Վատառողջ, ծանրաքաշ, սակավաշարժ քաղաքացուն բնակարանից իջեցնելու, բնակարան բարձրացնելու կամ բնակարանում տեղից տեղ տեղափոխելու կանչեր են սպասարկել Երեւանի Էրեբունի, Կենտրոն, Արաբկիր, Նոր Նորք, Ավան վարչական շրջանների եւ Կոտայքի փրկարարները: Տարբեր վայրերում արգելափակված (դիտահոր, վերելակի հորան, նկուղ, տանիք, շենքի օդատար-ծխատար, մեքենայի շարժիչի տակ եւ այլն) մի շարք կենդանիներ են ազատվել: Բնակավայրերի տարբեր մասերում՝ փողոցներ, բակեր, բնակիչներին անհանգստացնող շներին եւ կատուներին փրկարարները հեռացրել են անվտանգ տարածք: 5 օձ է հայտնաբերվել եւ տեղափոխվել անվտանգ տարածք: Տարբեր տարածքներում արգելափակված մեքենաներ են դուրս բերվել երթեւեկելի հատված:
Այլ կանչեր. Կոտայքի փրկարարներն ահազանգ են ստացել, որ 3 քաղաքացի մոլորվել են Գառնու ձորում՝ Երանոս լեռան մոտակայքում, անհրաժեշտ է փրկարարների օգնությունը: Փրկարարների ու հարակից գյուղերի բնակիչների համատեղ ջանքերով մոլորվածները, որոնցից մեկը՝ Շվեյցարիայի քաղաքացի, հայտնաբերվել են: Վայոց ձորի փրկարարներն ահազանգ են ստացել, որ Վայք-Սիսիան ավտոճանապարհին կայանած է Իրանի իսլամական հանրապետության համարանիշներով ավտոբաք, որից տհաճ հոտ ունեցող նյութ է թափվում: Փրկարարները պարզել են, որ մեքենան բեռնված է ժավելի սպիրտով, փականը խափանվել է, տեղի է ունեցել մոտ 5 տոննա ժավելի սպիրտի արտահոսք դեպի Արփա գետ եւ ափամերձ հատված: Հրշեջ-փրկարարները հողով ծածկել են աղտոտված հատվածը, գետ ներթափանցած հատվածը ողողել ջրով: Գետ թափված սպիրտի խտությունը նոսրացնելու նպատակով Հեր-Հերի ջրամբարից ջուր է բաց թողնվել:
