ՀՀ ներքին գործերի փոխնախարար Արփինե Սարգսյանի գլխավորած պատվիրակությունը մայիսի 17-19-ը Նյու-Յորքում մասնակցել է Աղետների ռիսկերի նվազեցման Սենդայի շրջանակային ծրագրի միջնաժամկետ վերանայման Միավորված ազգերի կազմակերպության գլխավոր ասամբլեայի բարձրաստիճան հանդիպմանը: Պատվիրակության կազմում էին աղետների ռիսկի նվազեցման Սենդայի ործողությունների ծրագրի Հայաստանի ազգային համակարգող, ՆԳՆ «Ճգնաժամային կառավարման պետական ակադեմիայի» ռեկտորի պարտականությունները կատարող, փ/ծ գնդապետ Արմինե Հայրապետյանը, Միավորված ազգերի կազմակերպությունում Հայաստանի մշտական ներկայացուցչության պաշտոնյաները:
Ըստ Արմինե Հայրապետյանի, հանդիպման ավարտին ընդունված Սենդայի շրջանակային ծրագրի միջնաժամկետ իրականացման գնահատման քաղաքական հռչակագիրը համահունչ է աղետների ռիսկի կառավարման ոլորտում Հայաստանի որդեգրած քաղաքականությանը: ՄԱԿ-ի աղետների ռիսկի նվազեցման գլխավոր գրասենյակը բարձր է գնահատում Հայաստանի քայլերը աղետների ռիսկի կառավարման ոլորտում:
Օգտագործելով պատեհությունը, մեր պատվիրակները մի շարք երկկողմ հանդիպումներ են ունեցել՝ ՄԱԿ-ի աղետների ռիսկի նվազեցման գլխավոր գրասենյակի, Եվրոպայի եւ Կենտրոնական Ասիայի տարածաշրջանային գրասենյակի ղեկավարության, Պորտուգալիայի ներքին գործերի պետական քարտուղար Պատրիցիա Գասպարիի ղեկավարած պատվիրակության հետ: Պորտուգալացի գործընկերներին է ներկայացվել կրթական, գիտատեխնիկական ուղղություններով համագործակցության առաջարկ: Պորտուգալիան, ինչպես եւ Հայաստանը՝ բազմաղետային երկիր է եւ աղետների ռիսկի կառավարման հարուստ փորձ ունի: Հատկապես ուսանելի է անտառային հրդեհների դեմ պայքարի պորտուգալական փորձը:
Միջազգային այս հավաքից մեկ շաբաթ անց՝ մայիսի 23-ին եւ 24-ին Ֆրանսիայի Մարսել քաղաքում, «Արդյունաբերական վթարների անդրսահմանային ազդեցության մասին» կոնվենցիայի շրջանակներում անցկացվել է «Քաված դասեր» 15-րդ համաժողովը, որին մասնակցում էր 32 երկրի 340 պատվիրակ՝ այդ թվում՝ գիտնականներ: Հայաստանը ներկայացրել են աղետների ռիսկի նվազեցման Սենդայի ործողությունների ծրագրի Հայաստանի ազգային համակարգող, ՆԳՆ «Ճգնաժամային կառավարման պետական ակադեմիայի» ռեկտորի պարտականությունները կատարող, փ/ծ գնդապետ Արմինե Հայրապետյանը եւ շրջակա միջավայրի նախարարությունից Լիաննա Փափախչյանը: Արմինե Հայրապետյանը կոնվենցիայի բյուրոյի բնատեխնածին աղետների աշխատանքային խմբի համակարգողն է:
Մանրամասն քննարկվել են բազմաթիվ մտահոգիչ հարցեր՝ օրինակ կենցաղային թափոնների աղբավայրերում հրդեհների պատճառները, քաղված դասերը, թույլատրելի եւ անթույլատրելի գործողությունները եւ այլն: Բոլոր հարցերը քննարկվում են Սենդայի ծրագրով արձանագրված «Վերակառուցենք ավելի լավ» սկզբունքով: Արմինե Հայրապետյանի խոսքով, քննարկումը կարեւոր էր փորձի փոխանակման հարթությունում: «Քաղված դասեր» համաժողովի արդյունքում ստեղծվել է աղետների համառոտ վերլուծություններ ամփոփող գիրք, որի եւ էլեկտրոնային եւ տպագիր տարբերակներն արդեն ՃԿՊԱ գրադարանում են: Գրքում տարբեր երկրների աղետներին հաջողված արձագանքների օրինակներ կան: «Մեր ակտիվացումը «Արդյունաբերական վթարների անդրսահմանային ազդեցության մասին» կոնվենցիա շրջանակներում բավական նպաստավոր կարող է դառնալ տեխնոլոգիական ռիսկերի նվազեցման ուղղությամբ ջանքերի իրականացման համար», — վստահ է Արմինե Հայրապետյանը:
Արամ ԶԱՔԱՐՅԱՆ
