Եվրոպական Միության «Արեւելյան գործընկերություն» նախաձեռնության շրջանակներում իրականացվող «Տեխնածին եւ տարերային աղետների կանխարգելում, պատրաստվածություն եւ արձագանքում» ծրագրի (Prevention, Preparedness and Response to natural and man-made disasters in Eastern Partnership countries` PPRD East) 3-րդ փուլի շրջանակներում, կազմակերպվում են թեմատիկ տեսակոնֆերանսներ՝ վեբինարներ, որոնց մասնակցում են ծրագրի շահառու երկրների արտակարգ իրավիճակներին արձագանքման պետական լիազոր մարմնի ներկայացուցիչներ, փորձագետներ: Հոկտեմբերի 6-ին կազմակերպված վեբինարի թեման էր՝ «Շվեդիայում 2018 թվականի անտառային հրդեհներից քաղված դասեր, միջազգային աջակցություն եւ կարողությունների հզորացում ազգային եւ տեղական մակարդակներում»: Բանախոս՝ Շվեդիայի արտակարգ իրավիճակների գործակալության (MSB) բնակչության եւ քաղաքացիական պաշտպանության ծրագրերի համակարգող Աննա-Կարլին Համրե: Իսկ նոյեմբերի 3-ի վեբինարի թեման էր՝ «Միջգերատեսչական համակարգում, հանրային իրազեկումը Շվեդիայի ճգնաժամային կառավարման ոլորտում»: Բանախոս՝ Շվեդիայի արտակարգ իրավիճակների գործակալության (MSB) ճգնաժամային հաղորդակցության ծրագրերի համակարգող Ժոսեֆին Բարկ: Նոյեմբերի 3-ի վեբինարին մասնակցում էր ավելի քան 50 փորձագետ «Արեւելյան գործընկերության», Եվրամիության եւ այլ երկրներից՝ Հայաստան, Վրաստան, Մոլդովա, Ուրկաինա, Իսպանիա, Նորվեգիա, Շվեդիա, Իսրայել եւ այլն:
Քանի որ աղետներին արձագանքումը երեք հարթություն ունի՝ աղետից առաջ, ընթացքում, հետո, Շվեդիայում շատ հարցեր երեք հարթության մեջ են դիտում: Օրինակ. արձագանքող ուժերը պետք է առաջնորդվեն երեք սկզբունքով՝ պատասխանատվություն, առավել մոտ լինեն հնարավոր աղետի տեղանքին, հասկական աղետների նմանությունը: Արձագանքող ուժերը երեք հիմնական դեր ունեն՝ դիմակայուն հասարակության ձեւավորում-պատրաստվածության բարձրացում, որոշումների եւ գործողությունների միասնական համակարգում, կարողությունների հզորացում-տեխնիկական զինվածության արդիականացում: Հանրային իրազեկման համար կիրառվում է երեք սկզբունք՝ ում ձայնով հոլովակն է առավել ազդեցիկ, կնո՞ջ, թե՞ տղամարդու, ում տեսքով պաստառը կամ տեսահոլովակը առավել ազդեցիկ կլինի կնո՞ջ, թե՞ տղամարդու, ինչպե՞ս է ընկալվում քարոզչական նյութը:
Ժոսեֆին Բարկի խոսքով, ճգնաժամը եւ քաղաքացիների կողմից դրա ընկալումը կարող են տարբեր լինել, ուստի հանրային իրազեկման համար պետք է օգտագործվեն բոլոր հնարավոր խողովակները՝ լրատվամիջոցներ, սոցիալական կայքեր: Պետք է ունենալ համագործակցող փորձագետների ցանց, անհրաժեշտության դեպքում նրանց միջոցով տեղեկություն տարածելու համար: Կարելի է օգտագործել նաեւ եկեղեցու հնարավորությունները, ոլորտում աշխատող հասարակական կազմակերպությունների կարողությունները. «տեղեկություն տնօրինողները պետք է ճիշտ համակարգեն առկա տեղեկությունները, որ իրար կրկնող կամ իրար հակասող հաղորդագրություններ չտարածեն, տեղեկություն տարածողները պետք է ճիշտ հարցեր տան: Ճգնաժամային հաղորդակցության գլխավոր խնդիրն է՝ ասել այն, ինչ բնակչությունն ուզում է լսել»: Ճգնաժամային հաղորդակցության ժամանակ տեղեկությունը պետք է լինի թափանցիկ, արդիական, վստահելի ու սրա արդյունքում մարդիկ կհավատան ու կհետեւեն պատկան կառույցների հրահանգներին: «Վստահություն ձեռք բերելը դժվար է, հանրային իրազեկումը պետք է մշտապես ցույց տա, թե ինչ ես անում, կատարելագործվելու տեղ միշտ կա», նկատեց Ժոսեֆին Բարկը:
Արամ ԶԱՔԱՐՅԱՆ
Հ.Գ. PPRD East 3 ծրագրի շրջանակում կկազմակերպվի եւս երկու վեբինար: Դեկտեմբերի մեկին՝ «Գենդերային հավասարությունը, մարդու իրավունքները, շրջակա միջավայրը աղետների ռիսկի կառավարման հարթությունում», դեկտեմբերի 8-ին՝ «Վաղ ազդարարման համակարգի իտալական փորձը»:
