Այսօր ՀՀ արտակարգ իրավիճակների նախարարությունում, նախարար Անդրանիկ Փիլոյանի նախագահությամբ, տեղի ունեցավ ԱԻՆ կոլեգիայի նիստ, որի ընթացքում ամփոփվեց 2020 թվականին կատարվածն ու ներկայացվեցին 2021 թվականին նախատեսված աշխատանքները:
2020 թվականին ՀՀ արտակարգ իրավիճակների նախարարությունը պետական բյուջեից ստացել է 13,7 միլիարդ դրամ, որի շրջանակներում էլ իրականացվել են աշխատանքները: Հրշեջ, փրկարարական, համակարգչային տեխնիկայի որոշ թարմացումներ, փրկարարների որակավորման բարձրացման, վերապատրաստման ծրագրեր են արվել օտարերկրյա պետությունների օժանդակությամբ (ԱՄՆ, Ռուսաստան եւ այլն): Կոտայքի մարզի Գետարգել համայնքում գտնվող «Ռուս-հայկական մարդասիրական արձագանքման կենտրոնը» օգնել է նաեւ օպերատիվ արձագանքման ժամանակ: Անցած տարի ՀՀ ԱԻՆ փրկարար ծառայության սպասարկած ավելի քան 25 000 կանչից հարյուրավորներին (ձյան մեջ արգելափակված մեքենաների դուրսբերում, անտառային հրդեհների մոնիտորինգ եւ այլն) մասնակցել են նաեւ ՌՀՄԱԿ մասնագետները: Կենտրոնի օգնությամբ է կազմակերպվել մարդասիրական բեռների տեղափոխումը Հայաստանից Արցախ:
ԱԻՆ «Տեխնիկական անվտանգության ազգային կենտրոնը» ավելի քան 10 000 փորձաքննություն է իրականացրել (վերելակ, կարուսել, կաթսայատուն, քիմիական օբյեկտ եւ այլն): Կենտրոնի փորձագետների եզրակացությամբ Երեւանում 437 վերելակ է փոխարինվել նորով:
«Սեյսմիկ պաշտպանության տարածքային ծառայությունը» շենքերի սեյսմիկ խոցելիության 60 հետազոտություն է իրականացրել, կազմակերպել տարհանման վարժանքներ:
ԱԻՆ «Ճգնաժամային կառավարման պետական ակադեմիայում» վերապատրաստման եւ որակավորման բարձրացման դասընթացների է մասնակցել ավելի քան 2600 փրկարար, մոտ 3000 քաղաքացիական անձ: Արցախյան երկրորդ պատերազմի օրերին լրագրողների համար կազմակերպվել է ռազմական գործողությունների գոտում աշխատելու անվտանգության թեմայով վերապատրաստում:
Կորոնավիրուսի համաճարակի պատճառով մի շարք ծրագրեր են հետաձգվել, սակայն արվածը լայնորեն լուսաբանվել է լրատվամիջոցներով: 2020 թվականին ՀՀ արտակարգ իրավիճակների նախարարության տարբեր ստորաբաժանումների մասին 46 000 հրապարակում եւ լուսաբանում է եղել, ավելի քան 100 լրատվամիջոցում՝ համացանցային, տպագիր, հեռարձակվող:
Արամ ԶԱՔԱՐՅԱՆ
Հ.Գ. 2020 թվականի աշխատանքների մասին կարդացեք նաեւ.
Տարվա ամփոփում. Մայրաքաղաք եւ մարզեր