ՀՀ արտակարգ իրավիճակների նախարարության առաջարկով կառավարությունն այսօր՝ հունվարի 23-ին հաստատել է Վայոց ձորի մարզի Ջերմուկ քաղաքի բազմաբնակարան բնակելի շենքերի սեյսմիկ խոցելիության գնահատման պիլոտային ծրագիրը:
Հայաստանի Հանրապետության արտակարգ իրավիճակների նախարարության «Սեյսմիկ պաշտպանության տարածքային ծառայության» մշակած ծրագրի նպատակն է գնահատել Ջերմուկ քաղաքի բազմաբնակարան բնակելի շենքերի սեյսմիկ խոցելիության աստիճանը եւ սեյսմիկ ռիսկի նվազեցման առաջարկներ մշակել:
Ծրագրի ընթացքում կվերլուծվեն շենքերի նախագծային փաստաթղթերը, իսկ դրանց բացակայության դեպքում կիրականացվեն չափագրման աշխատանքներ: Կուսումնասիրվեն շենքերի կրող կոնստրուկտիվ տարրերը, կգնահատվեն երկաթբետոնե ու մետաղական կոնստրուկցիաների վնասվածքների աստիճաններն ու առաջացման պատճառները, կորոշվեն բետոնի ամրության բնութագրերը, խտությունն ու որակը, կոնստրուկտիվ տարրերի միացումների որակը եւ այլն: Հետազննություններն ամբողջական դարձնելու համար նախատեսվում է օգտագործել կրող կոնստրուկտիվ տարրերի ամրության բնութագրերի որոշման ժամանակակից սարքավորումներ, թվային հեռաչափական լազերային գործիքներ, թվային ֆոտոխցիկներ, որոնց միջոցով կլուսանկարվեն կոնստրուկցիաներում բացահայտված վնասվածքները, թերությունները, դեֆորմացիաները, շենքերի ընդհանուր տեսքերը, որպեսզի դրանցից առավել բնութագրականները ֆիքսվեն եզրակացություններում: Ժամանակակից սեյսմիկ սարքավորումներով կորոշվեն ուսումնասիրվող շենքերի դինամիկ բնութագրերը:
Հետազոտման համար կընտրվի մոտ 10 շենք` տարբեր ծավալահատակագծային ու կոնստրուկտիվ լուծումներով եւ կառուցված տարբեր գրունտային պայմաններում:
Ջերմուկ քաղաքի բազմաբնակարան բնակելի շենքերի սեյսմիկ խոցելիության գնահատման պիլոտային ծրագիրը կիրականացվի ՀՀ արտակարգ իրավիճակների նախարարության ռեսուրսների հաշվին: Նախնական տվյալներով կծախսվի մոտ 10 միլիոն դրամ:
