Անցած շաբաթ ՀՀ արտակարգ իրավիճակների նախարարության փրկարար ծառայության ստորաբաժանումներն արտակարգ իրավիճակների, դեպքերի ու պատահարների վերաբերյալ 916 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիա Ջուր», «Սանիթեք», էլցանց, գազի վթարային ծառայություն, կանաչապատման ծառայություն, ոստիկանություն եւ այլն:
Շոգ եղանակով պայմանավորված մեծ է հրդեհների քանակը, գրանցվել է 591 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, աղբ, ջերմահարվել են պտղատու եւ դեկորատիվ ծառեր: Գրանցվել է նաեւ հրդեհի 47 կեղծ կանչ:
Փրկարարները 146 կենցաղային կանչ են ստացել, որից մոտ 90-ը` փակ դուռ բացելու վերաբերյալ: Վատառողջ, ծանրաքաշ, սակավաշարժ քաղաքացուն բնակարանից իջեցնելու, բնակարան բարձրացնելու կամ բնակարանում տեղից տեղ տեղափոխելու կանչեր են սպասարկվել Երեւանի Նոր Նորք, Կենտրոն, Արաբկիր, Քանաքեռ-Զեյթուն, Շենգավիթ, Ավան, Աջափնյակ վարչական շրջաններում, Կապան, Գավառ, Սեւան, Վանաձոր եւ Աբովյան քաղաքներում։ Տարբեր վայրերում արգելափակված (դիտահոր, վերելակի հորան, նկուղ, տանիք, շենքի օդատար-ծխատար, մեքենայի շարժիչի տակ, ջրանցք եւ այլն) մի շարք կենդանիներ են ազատվել: Բնակավայրերի տարբեր մասերում՝ փողոցներ, բակեր, բնակիչներին անհանգստացնող շներին եւ կատուներին փրկարարները հեռացրել են անվտանգ տարածք: Արգելափակված 5 մեքենա է հանվել երթեւեկելի հատված, անվտանգ տարածք է տեղափոխվել 5 մարդ: Բնակարաններում կամ այլ վայրերում օձ նկատելու վերաբերյալ 43 ահազանգ է ստացվել: Օձ հայտնաբերվել եւ անվտանգ տարածք է տեղափոխվել 15 դեպքում:
Այլ կանչեր.
Երեւանի փրկարարական վարչության թիվ 18 փրկարարական ջոկատն օգնել է Պարույր Սեւակի փողոցի բնակչին, որը կանչ էր տվել մատանին մատից հանելու խնդրանքով:
Իջեւանի փրկարարները Ենոքավան գյուղի «Լաստիվեր» հանգստյան գոտու տարածքում տարբեր օրերի երկու ահազանգ են սպասարկել՝ ոտքի բարդ կոտրվածք եւ ինքնազգացողության վատացում: Երկու դեպքում էլ փրկարարները ոտքով մոտ 1 կմ պատգարակով տեղափոխել են տուժածներին եւ հանձնել շտապօգնության աշխատակիցներին:
Լոռու մարզային Ճգնաժամային կառավարման կենտրոնում ահազանգ է ստացվել, որ Սուրբ Հովհաննես մատուռ տանող ավտոճանապարհին մթության պատճառով քաղաքացիներ են մոլորվել: Սպիտակի փրկարարները հայտնաբերել են 7 հոգու եւ ուղեկցել իրենց մեքենաների մոտ:
Ամասիա գյուղի «Թորոսի յայլա» կոչվող հանդամասում կովն ընկել էր մոտ 1,5 մետր խորությամբ ջրանցքը: Մարալիկի փրկարարները դուրս են բերել կենդանուն եւ տեղափոխել անվտանգ տարածք:
Վայոց ձորի Քարագլուխ գյուղի մոտակայքում մեքենան դուրս էր եկել ավտոճանապարհի երթեւեկելի հատվածից եւ մոտ 300 մ գլորվել ձորը: Եղեգնաձորի փրկարարները տեղափոխել են տուժածներին դեպի շտապօգնության մեքենան: