Անցած շաբաթ ՀՀ արտակարգ իրավիճակների նախարարության փրկարար ծառայության ստորաբաժանումները արտակարգ իրավիճակների, դեպքերի ու պատահարների վերաբերյալ 770 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիա Ջուր», «Սանիթեք», էլցանց, գազի վթարային ծառայություն, կանաչապատման ծառայություն, ոստիկանություն եւ այլն:
Շոգ եղանակով պայմանավորված մեծ է հրդեհների քանակը, գրանցվել է 466 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, աղբ, ջերմահարվել են պտղատու եւ դեկորատիվ ծառեր: Գրանցվել է նաեւ հրդեհի 32 կեղծ կանչ:
Փրկարարները 159 կենցաղային կանչ են ստացել, որից մոտ 100-ը փակ դուռ բացելու վերաբերյալ: Վատառողջ, ծանրաքաշ, սակավաշարժ քաղաքացուն բնակարանից իջեցնելու, բնակարան բարձրացնելու կամ բնակարանում տեղից տեղ տեղափոխելու կանչեր են սպասարկվել Երեւանի Նոր Նորք, Քանաքեռ-Զեյթուն, Մալաթիա-Սեբաստիա, Կենտրոն վարչական շրջաններում, Արարատ: Տարբեր վայրերում արգելափակված (դիտահոր, վերելակի հորան, նկուղ, տանիք, շենքի օդատար-ծխատար, մեքենայի շարժիչի տակ, ջրանցք եւ այլն) մի շարք կենդանիներ են ազատվել: Բնակավայրերի տարբեր մասերում՝ փողոցներ, բակեր, բնակիչներին անհանգստացնող շներին եւ կատուներին փրկարարները հեռացրել են անվտանգ տարածք: Արգելափակված 4 մեքենա է հանվել երթեւեկելի հատված, անվտանգ տարածք է տեղափոխվել 4 մարդ: Բնակարաններում կամ այլ վայրերում օձ նկատելու վերաբերյալ 50 ահազանգ է ստացվել: Օձ հայտնաբերվել եւ անվտանգ տարածք է տեղափոխվել 21 դեպքում:
Այլ կանչեր. Արմավիրի փրկարարներն ահազանգ են ստացել, որ Ջրարբի գյուղի վարչական տարածքում խոշոր եղջրավոր անասունն արգելափակվել է լողավազանում, անհրաժեշտ է փրկարարների օգնությունը: Հրշեջ-փրկարարները լողավազանից դուրս են կենդանուն: Կոտայքի փրկարարներն ահազանգ են ստացել, որ Պռոշյան գյուղի վերջնամասում կատաղած շունն արձակվել է կապից եւ կծել տիրոջը, վերջինս ստացել է անհրաժեշտ բուժօգնություն, շանը բռնելու համար անհրաժեշտ է փրկարարների օգնությունը: Փրկարաները բռնել են շանը եւ կապել: Նույն մարզում ահազանգ է ստացվել, որ Չարենցավան քաղաքի Արջաձոր թաղամասում երեխան ժայռից չի կարողանում իջնել, անհրաժեշտ է փրկարարների օգնությունը: Հրշեջ-փրկարարները մոտ 20 մետր բարձրության ժայռից անվնաս իջեցրել են 12-ամյա տղային: Արարատի փրկարարներն ահազանգ են ստացել, որ Ղուկասավան գյուղի թանգարանի մոտակայքում արագիլի ձագն ընկել է բնից: Հրշեջ-փրկարարները արագիլի ձագին տեղավորել են բնի մեջ:
Անցած շաբաթ փրկարարները դպրոցներում, մանկապարտեզներում եւ այլ հաստատություններում կազմակերպել են «Փրկարարական գործ եւ առաջին բուժօգնություն», «Գետանցում եւ առաջին բուժօգնություն» եւ այլ թեմաներով ուումնավարժանքներ եւ դասընթացներ: