ՀՀ արտակարգ իրավիճակների նախարարությունը հանրային քննարկման է ներկայացրել «Շենքերի եւ շինությունների սեյսմակայունության եւ տեխնիկական վիճակի պարտադիր գույքագրման կարգը, պարտադիր գույքագրման տվյալների տեղեկանքի օրինակելի ձեւը հաստատելու մասին» կառավարության որոշման նախագիծ:
Նախագիծը «Սեյսմիկ պաշտպանության մասին» Հայաստանի Հանրապետության օրենքի պահանջն է: Ըստ օրենքի, շենքերի եւ շինությունների սեյսմակայունության եւ տեխնիկական վիճակի պարտադիր գույքագրման կարգը սահմանում է Հայաստանի Հանրապետության կառավարությունը:
Շենքերի եւ շինությունների սեյսմակայունության եւ տեխնիկական վիճակի գույքագրումը դրանց փաստացի վիճակի արձանագրումն է եւ սեյսմիկ ռիսկի գնահատման աշխատանքների սկզբնական փուլը: Այս գույքագրումն անհրաժեշտ է շենքերի եւ շինությունների հետազննություններ կատարելու, դրանց հուսալիության գնահատման եւ անվտանգ շահագործումն ապահովելու ուղղությամբ համապատասխան միջոցառումներ, այդ թվում` կանխարգելիչ միջոցառումներ իրականացնելու համար որոշում կայացնելու նպատակով:
Գույքագրման տվյալները պահվելու են շենքերի ու շինությունների տվյալների միասնական տեղեկատվական բազայում: Յուրաքանչյուր շենքի եւ շինության համար նշվելու է կառուցման տարեթիվը, ընդհանուր մակերեսը, հարկայնությունը, մուտքերի թիվը, բնակարանների (աշխատասենյակների) քանակը եւ այլն:
