Անցած շաբաթ ՀՀ արտակարգ իրավիճակների նախարարության փրկարար ծառայության ստորաբաժանումները արտակարգ իրավիճակների, դեպքերի ու պատահարների վերաբերյալ 411 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիա Ջուր», «Սանիթեք», էլցանց, գազի վթարային ծառայություն, կանաչապատման ծառայություն, ոստիկանություն եւ այլն:
Գրանցվել է 82 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, աղբ, ջերմահարվել են պտղատու եւ դեկորատիվ ծառեր: Գրանցվել է նաեւ հրդեհի 23 կեղծ կանչ:
Փրկարարները 163 կենցաղային կանչ են ստացել, որից 100-ը փակ դուռ բացելու վերաբերյալ: Վատառողջ, ծանրաքաշ, սակավաշարժ քաղաքացուն բնակարանից իջեցնելու, բնակարան բարձրացնելու կամ բնակարանում տեղից տեղ տեղափոխելու կանչեր են սպասարկվել Երեւանի Նոր Նորք, Արաբկիր, Կենտրոն, Մալաթիա-Սեբաստիա, Աջափնյակ, Շենգավիթ վարչական շրջաններում եւ Կոտայքում: Տարբեր վայրերում արգելափակված (դիտահոր, վերելակի հորան, նկուղ, տանիք, շենքի օդատար-ծխատար, մեքենայի շարժիչի տակ, ջրանցք եւ այլն) մի շարք կենդանիներ են ազատվել: Բնակավայրերի տարբեր մասերում՝ փողոցներ, բակեր, բնակիչներին անհանգստացնող շներին եւ կատուներին փրկարարները հեռացրել են անվտանգ տարածք: Տարբեր վայրերում արգելափակված 5 մեքենա է հանվել երթեւեկելի հատված, անվտանգ տարածք է տեղափոխվել 5 մարդ: 33 օձ է հայտնաբերվել եւ տեղափոխվել անվտանգ տարածք:
Այլ կանչեր. Կենտրոնի փրկարարներն ահազանգ են ստացել, որ Երվանդ Քոչարի փողոցում քաղաքացին բարձրացել է տներից մեկի տանիք, ինքնազգացողությունը վատացել է եւ չի կարողանում ինքնուրույն իջնել: Հրշեջ-փրկարարները 90 տարեկան պապիկին իջեցրել են տանիքից: Աջափնյակի փրկարարներն ահազանգ են ստացել, որ Շինարարների փողոցի շենքերից մեկի 9-րդ հարկի մակարդակում աշխատանքներ կատարելիս վերամբարձ կռունկը խափանվել է, ինչի հետեւանքով քաղաքացիները մոտ 3 ժամ մնացել են կռունկի վրա, իջեցնելու համար անհրաժեշտ է փրկարարների օգնությունը։ Հրշեջ փրկարարներն ավտոամբարձիչից իջեցրել են 42 եւ 49 ամյա երկու տղամարդու: Սյունեցի փրկարարներն ահազանգ են ստացել, որ Մեղրի քաղաքում շունը մտել է տներից մեկի լոգասենյակ, դուրս բերելու համար անհրաժեշտ է փրկարարների օգնությունը: Հրշեջ-փրկարարները շանը դուրս են բերել սանհանգույցից եւ տեղափոխել անվտանգ տարածք:
Անցած շաբաթ փրկարարները դպրոցներում եւ այլ հաստատություններում կազմակերպել են «ՔՊ միջոցառումների կազմակերպումը հակառակորդի հարձակման վտանգի դեպքում», «Հրդեհաշիջման աշխատանքների իրականացումը ուսումնական հաստատությունում», «Աղետների ռիսկերի նվազեցման պլանների կիրառելիությունը», «Հրդեհաշիջման իրականացումը դպրոցի կաթսայատանը», «Հրդեհ դպրոցի դասասենյակում», «Հրդեհաշիջման եւ տարհանման աշխատանքների կազմակերպումը ուսումնական հաստատություններում», «Տարհանում, հրդեհաշիջում եւ առաջին օգնություն» եւ այլ թեմաներով ուումնավարժանքներ եւ դասընթացներ:
