Անցած շաբաթ ՀՀ արտակարգ իրավիճակների նախարարության փրկարար ծառայության ստորաբաժանումները արտակարգ իրավիճակների, դեպքերի ու պատահարների վերաբերյալ 296 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիա Ջուր», «Սանիթեք», էլցանց, գազի վթարային ծառայություն, կանաչապատման ծառայություն, ոստիկանություն եւ այլն:
Գրանցվել է 61 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, ջերմահարվել են պտղատու եւ դեկորատիվ ծառեր: Գրանցվել է նաեւ հրդեհի 13 կեղծ կանչ:
Փրկարարները 125 կենցաղային կանչ են ստացել, որից 81-ը փակ դուռ բացելու վերաբերյալ: Վատառողջ, ծանրաքաշ, սակավաշարժ քաղաքացուն բնակարանից իջեցնելու, բնակարան բարձրացնելու կամ բնակարանում տեղից տեղ տեղափոխելու կանչեր են սպասարկել Երեւանի Ավան, Նոր Նորք, Արաբկիր, Կենտրոն, Աջափնյակ վարչական շրջանների եւ Շենգավիթի, Գեղարքունիքի, Շիրակի փրկարարները: Տարբեր վայրերում արգելափակված (դիտահոր, վերելակի հորան, նկուղ, տանիք, շենքի օդատար-ծխատար, մեքենայի շարժիչի տակ եւ այլն) մի շարք կենդանիներ են ազատվել: Բնակավայրերի տարբեր մասերում՝ փողոցներ, բակեր, բնակիչներին անհանգստացնող շներին եւ կատուներին փրկարարները հեռացրել են անվտանգ տարածք: Տարբեր վայրերում արգելափակված 265 մեքենա (265 ուղեւորով) է հանվել երթեւեկելի հատված:
Այլ կանչեր. Արաբկիրի փրկարարները գիշերով ահազանգ են ստացել, որ Հրաչյա Քոչար փողոցի շենքերից մեկում ռումբ է տեղադրված: Դեպքի վայրի տեղազննման արդյունքում ռումբ չի հայտնաբերվել: Կենտրոնի փրկարարները կեսգիշերին մոտ ահազանգ են ստացել, որ «Հաղթանակ» կամրջի վրա քաղաքացին անցել է ճաղավանդակները եւ ցանկանում է ինքնասպան լինել։ Դեպքի վայրի տեղազննման արդյունքում ինքնասպանություն գործելու ցանկություն ունեցող քաղաքացի չի հայտնաբերվել։
Գեղարքունիքի փրկարարներն ահազանգ են ստացել, որ Գեղարքունիք գյուղի սկզբնամասում անօդաչու թռչող սարքը մնացել է ծառի վրա. իջեցնելու համար անհրաժեշտ է փրկարարների օգնությունը: Հրշեջ-փրկարարները ծառից իջեցրել են սարքը։ Նույն մարզում ահազանգ է ստացվել, որ Ճամբարակ համայնքի Զորավար Անդրանիկի փողոցի կաթսայատան ծխնելույզի ապամոնտաժման աշխատանքների համար անրաժեշտ է փրկարարների օգնությունը։ Հրշեջ-փրկարարներն ապամոնտաժել են մոտ 35մ երկարությամբ եւ 50 սմ տրամագծով խողովակը։
