Անցած շաբաթ ՀՀ արտակարգ իրավիճակների նախարարության փրկարար ծառայության ստորաբաժանումները արտակարգ իրավիճակների, դեպքերի ու պատահարների վերաբերյալ 305 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիա Ջուր», «Սանիթեք», էլցանց, գազի վթարային ծառայություն, կանաչապատման ծառայություն, ոստիկանություն եւ այլն:
Գրանցվել է 83 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, ջերմահարվել են պտղատու եւ դեկորատիվ ծառեր: Գրանցվել է նաեւ հրդեհի 9 կեղծ կանչ:
Փրկարարները 115 կենցաղային կանչ են ստացել, որից 89-ը փակ դուռ բացելու վերաբերյալ: Վատառողջ, ծանրաքաշ, սակավաշարժ քաղաքացուն բնակարանից իջեցնելու, բնակարան բարձրացնելու կամ բնակարանում տեղից տեղ տեղափոխելու կանչեր են սպասարկել Երեւանի Աջափնյակ, Կենտրոն, Մալաթիա-Սեբաստիա, Նոր Նորք վարչական շրջանների եւ Արմավիրի փրկարարները: Տարբեր վայրերում արգելափակված (դիտահոր, վերելակի հորան, նկուղ, տանիք, շենքի օդատար-ծխատար, մեքենայի շարժիչի տակ եւ այլն) մի շարք կենդանիներ են ազատվել: Բնակավայրերի տարբեր մասերում՝ փողոցներ, բակեր, բնակիչներին անհանգստացնող շներին եւ կատուներին փրկարարները հեռացրել են անվտանգ տարածք: Տարբեր վայրերում արգելափակված 17 մեքենա (26 ուղեւորով) է հանվել երթեւեկելի հատված:
Այլ կանչեր. Նոր Նորքի փրկարարներն ահազանգ են ստացել, որ Գյուրջյան փողոցի շենքերից մեկի մի բնակիչ ոչ սթափ վիճակում փակվել է տանը եւ սպառնում է քացախաջուր խմել: Դեպքի վայր հասած փրկարարները պարզել են, որ 48-ամյա կինը անձնական խնդիրների պատճառով վիճել է ամուսնու հետ: Հոգեբան-փրկարարները օգնել են քաղաքացուն:
Սյունիքի փրկարարներն ահազանգ են ստացել, որ Գորիս-Կապան ճանապարհի «Ծակեր» կոչվող հատվածում, տեղի է ունեցել քարաթափում, ավտոճանապարհը միակողմանի փակվել է: Հրշեջ-փրկարարները եւ ճանապարհը սպասարկող ընկերության աշխատակիցները հատուկ տեխնիկայի օգնությամբ հեռացրել են քարերը եւ վերականգնել երթեւեկությունը: