Անցած շաբաթ ՀՀ արտակարգ իրավիճակների նախարարության փրկարար ծառայության ստորաբաժանումները արտակարգ իրավիճակների, դեպքերի ու պատահարների վերաբերյալ 245 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիա Ջուր», «Սանիթեք», էլցանց, գազի վթարային ծառայություն, կանաչապատման ծառայություն, ոստիկանություն եւ այլն:
Գրանցվել է 60 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, ջերմահարվել են պտղատու եւ դեկորատիվ ծառեր: Գրանցվել է նաեւ հրդեհի 14 կեղծ կանչ:
Փրկարարները 82 կենցաղային կանչ են ստացել, որից 60-ը փակ դուռ բացելու վերաբերյալ: Վատառողջ, ծանրաքաշ, սակավաշարժ քաղաքացուն բնակարանից իջեցնելու, բնակարան բարձրացնելու կամ բնակարանում տեղից տեղ տեղափոխելու կանչեր են սպասարկել Երեւանի Արաբկիր, Աջափնյակ, Շենգավիթ, Մալաթիա-Սեբաստիա վարչական շրջանների եւ Լոռու ու Կոտայքի փրկարարները: Տարբեր վայրերում արգելափակված (դիտահոր, վերելակի հորան, նկուղ, տանիք, շենքի օդատար-ծխատար, մեքենայի շարժիչի տակ եւ այլն) մի շարք կենդանիներ են ազատվել: Բնակավայրերի տարբեր մասերում՝ փողոցներ, բակեր, բնակիչներին անհանգստացնող շներին եւ կատուներին փրկարարները հեռացրել են անվտանգ տարածք: Տարբեր վայրերում արգելափակված 47 մեքենա (115 ուղեւորով) է հանվել երթեւեկելի հատված:
Այլ կանչեր. Աջափնյակի փրկարարներն ահազանգ են ստացել, որ Մարգարյան փողոցի շենքերից մեկի մի բնակարանի դուռը փակվել է, բացելու համար անհրաժեշտ է փրկարարների օգնությունը: Փրկարարները բացել են դուռը եւ բնակարանում հայտնաբերել անսթափ երկու քաղաքացու: Դավիթաշենի փրկարարները 28-ամյա մի կնոջ այտուցված մատից հանել են մատանին: Իսկ Արարատի Բարձրաշեն գյուղում 6 տարեկան աղջկա մատն արգելափակվել է մետաղյա օղակում: Փրկարարներն օղակը դուրս են բերել մատից: Արմավիրի փրկարարները կեսգիշերին մոտ, 41-ամյա մի քաղաքացուց ահազանգ են ստացել, որ ինքը մեքենայով մոլորվել է «Մարշալ Բաղրամյան» ուսումնական զորամասի դաշտամիջյան ճանապարհին: Փրկարարները եւ ոստիկանության աշխատակիցները հայտնաբերել են մեքենան եւ վարորդին:
