Անցած շաբաթ ՀՀ արտակարգ իրավիճակների նախարարության փրկարար ծառայության ստորաբաժանումները արտակարգ իրավիճակների վերաբերյալ 278 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիա Ջուր», «Սանիթեք», էլցանց, գազի վթարային ծառայություն, կանաչապատման ծառայություն, ոստիկանություն եւ այլն:
Գրանցվել է 69 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, ջերմահարվել են պտղատու եւ դեկորատիվ ծառեր: Գրանցվել է նաեւ հրդեհի 13 կեղծ կանչ:
Փրկարարները 104 կենցաղային կանչ են ստացել, որից 70-ը փակ դուռ բացելու վերաբերյալ: Վատառողջ, ծանրաքաշ, սակավաշարժ քաղաքացուն բնակարանից իջեցնելու, բնակարան բարձրացնելու կամ բնակարանում տեղից տեղ տեղափոխելու կանչեր են սպասարկել Երեւանի Աջափնյակ, Դավիթաշեն, Նոր նորք, Քանաքեռ-Զեյթուն, Ավան, Շենգավիթ վարչական շրջանների եւ Կոտայքի ու Շիրակի փրկարարները: Տարբեր վայրերում արգելափակված (դիտահոր, վերելակի հորան, նկուղ, տանիք, շենքի օդատար-ծխատար, մեքենայի շարժիչի տակ եւ այլն) մի շարք կենդանիներ են ազատվել: Բնակավայրերի տարբեր մասերում՝ փողոցներ, բակեր, բնակիչներին անհանգստացնող շներին եւ կատուներին փրկարարները հեռացրել են անվտանգ տարածք: Տարբեր վայրերում արգելափակված 22 մեքենա (58 ուղեւորով) է հանվել երթեւեկելի հատված:
Այլ կանչեր. Հունվարի 25-ին եւ 26-ին Կոտայքի փրկարարներն ահազանգ են ստացել, որ Աշտարակի խճուղում գտնվող «Կովկաս» ռեստորանային համալիրում ռումբ է տեղադրված: Երկու դեպքում էլ փրկարարները սահմանազատել են տարածքը եւ ոստիկանների եւ զինվորականների օգնությամբ հետախուզել: Ռումբ չի հայտնաբերվել։
Իսկ Սյունիքում համանման ահազանգը իրական էր: Փրկարարներն ահազանգ են ստացել, որ Կարմրաքար գյուղի տներից մեկի պատի մեջ երկու ական է հայտնաբերվել: Պարզվել է, որ դրանք նռնականետի արկեր են: Փրկարարները սահմանազատել են տարածքը եւ զինամթերքը փոխանցել դեպքի վայր ժամանած ոստիկաններին: