Անցած շաբաթ ՀՀ արտակարգ իրավիճակների նախարարության փրկարար ծառայության ստորաբաժանումները արտակարգ իրավիճակների վերաբերյալ ավելի քան 700 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիա Ջուր», էլցանց, գազի վթարային ծառայություն, կանաչապատման, սանմաքրման ծառայություն, ոստիկանություն եւ այլն:
Բարձր ջերմաստիճանով պայմանավորված մեծ է հրդեհների քանակը: Գրանցվել է ավելի քան 200 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, ջերմահարվել են պտղատու եւ դեկորատիվ ծառեր: Համայնքամերձ բուսածածկ տարածքների հրդեհների ժամանակ հրշեջ-փրկարարներին օգնել են հարակից համայնքների բնակիչները, մոտակայքում տեղակայված զորամասի զինծառայողները, կոմունալ ծառայությունների աշխատակիցները:
Փակ դուռ բացելու վերաբերյալ էլ 116 կանչ է ստացվել: Վատառողջ, ծանրաքաշ, սակավաշարժ քաղաքացուն բնակարանից իջեցնելու, բնակարան բարձրացնելու կամ բնակարանում տեղից տեղ տեղափոխելու կանչեր են սպասարկել Երեւանի Ավան, Արաբկիր, Կենտրոն, Շենգավիթ, Էրեբունի, Աջափնյակ վարչական շրջանների և Շիրակի մարզի փրկարարները: Տարբեր վայրերում արգելափակված (դիտահոր, վերելակի հորան, նկուղ, տանիք, շենքի օդատար-ծխատար, մեքենայի շարժիչի տակ եւ այլն) մի շարք կենդանիներ են ազատվել: Բնակավայրերի տարբեր մասերում՝ փողոցներ, բակեր, բնակիչներին անհանգստացնող շներին եւ կատուներին փրկարարները հեռացրել են անվտանգ տարածք: 8 օձ է հայտնաբերվել եւ տեղափոխվել անվտանգ տարածք: Տարբեր տարածքներում արգելափակված տասնյակ մեքենաներ են դուրս բերվել երթեւեկելի հատված:
Այլ կանչեր:
Կոտայքի մարզի Քասախ գյուղի տներից մեկում զգացվել են թույլ ցնցումներ։ Դեպքի վայր ժամանած փրկարարների հետախուզության արդյունքում պարզվել է, որ հնարավոր պատճառը տան մոտակայքով անցնող Ապարան-Երեւան ջրագծի ջրի ուժեղ ճնշումն է։
Կենտրոն բաժնի փրկարարներն ահազանգ են ստացել, որ բնակարաններից մեկում ծուխ է նկատվում: Պարզվել է, որ քաղաքացին պատշգամբում խորոված է պատրաստում։
Արմավիրի փրկարարները Գրիբոյեդով գյուղի գերեզմանատան մոտակայքում վիրավոր արագիլ են հայտնաբերել և տեղափոխել Արմավիր քաղաքի կենդանաբանական այգի։
Արարատի փրկարարները ահազանգ են ստացել, որ մանկապարտեզի սաներից մեկն արգելափակվել է ճաղավանդակների արանքում։ Փրկարարներն օգնել են 3-ամյա փոքրիկին։
Լոռու փրկարարները Սպիտակ քաղաքի բնակչից ահազանգ են ստացել, որ տներից մեկին հարակից այգու ծառի վրա օձ կա։ Տեղում պարզվել է՝ ծառից փուչիկ է կախված, որն օձի տպավորություն էր թողնում։
Տավուշի մարզի Ենոքավան գյուղում գտնվող «Լաստիվեր» կոչվող հանգստյան գոտու մոտակա անտառում մոլորվել էր արշավախմբի անդամներից մեկը։ Փրկարարները հայտնաբերել են 17-ամյա պատանուն։