Գլխավոր Հրշեջ-փրկարարներ Փրկարարները քաղաքացիներին իջեցրել են տանիքից

Փրկարարները քաղաքացիներին իջեցրել են տանիքից

220
Տարածել

Անցած շաբաթ  ՀՀ արտակարգ իրավիճակների նախարարության փրկարար ծառայության ստորաբաժանումները արտակարգ իրավիճակների վերաբերյալ ավելի քան 600 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիա Ջուր», էլցանց, գազի վթարային ծառայություն, կանաչապատման, սանմաքրման ծառայություն, ոստիկանություն եւ այլն:

Բարձր ջերմաստիճանով պայմանավորված աճել է հրդեհների քանակը: Գրանցվել է ավելի քան 200 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, ջերմահարվել են պտղատու եւ դեկորատիվ ծառեր:  Փակ դուռ բացելու վերաբերյալ էլ 130 կանչ է ստացվել: Վատառողջ, ծանրաքաշ, սակավաշարժ քաղաքացուն բնակարանից իջեցնելու, բնակարան բարձրացնելու կամ բնակարանում տեղից տեղ տեղափոխելու կանչեր են սպասարկել Երեւանի Արաբկիր, Էրեբունի, Կենտրոն, Շենգավիթ, Ավան, Աջափնյակ վարչական շրջանների եւ Տավուշի ու Լոռու փրկարարները: Տարբեր վայրերում արգելափակված (դիտահոր, վերելակի հորան, նկուղ, տանիք, շենքի օդատար-ծխատար, մեքենայի շարժիչի տակ եւ այլն) մի շարք կենդանիներ են ազատվել: Բնակավայրերի տարբեր մասերում՝ փողոցներ, բակեր, բնակիչներին անհանգստացնող շներին եւ կատուներին փրկարարները հեռացրել են անվտանգ տարածք: 21 օձ է հայտնաբերվել եւ տեղափոխվել անվտանգ տարածք: Տարբեր տարածքներում արգելափակված տասնյակ մեքենաներ են դուրս բերվել երթեւեկելի հատված:

Այլ կանչեր: Էրեբունու փրկարարներն ահազանգ են ստացել, որ Խաղաղ Դոնի փողոցում երկու քաղաքացի չեն կարողանում իջնել երկհարկանի կիսակառույց շինության տանիքից: Հրշեջ-փրկարարները քաղաքացիներին իջեցրել են տանիքից: Նոր Նորքի փրկարարներն ահազանգ են ստացել, որ Շոպրոնի փողոցում մեծ քանակությամբ սնդիկ է թափված: Հրշեջ-փրկարարները սահմա­նազատել են տարածքը, ճառագայթային, քիմիական, կենսաբանական, միջուկային մոնիտորինգի մասնագետ փրկարարները հավաքել են թափված սնդիկը, հրշեջ-փրկարարները լվացել են տարածքը: Աջափնյակի փրկարարներն ահազանգ են ստացել, որ Նորաշեն թաղամասում 7 եւ 12 տարեկան երեխաները տան մենակ են եւ վախեցած: Դեպքի վայր է մեկնած հոգեբան-փրկարարը երեխաների հետ զրուցել է եւ հանգստացրել նրանց:

Արմավիրի փրկարարներն ահազանգ են ստացել, որ Մեծամոր գյուղում վիրավոր արագիլ է ընկած: Փրկարարները արագիլին տեղափոխոխել են Արմավիր քաղաքի կենդանա­բանա­կան այգի: Կոտայքի, Սյունիքի, Շիրակի փրկարարները տարբեր վայրերում արգելափակված՝ ջրհոր, ձոր, ջրափոս, տան նկուղ, խոշոր եղջրավոր անասուններին հանել եւ վերադարձրել են տերերին:

Փրկարարները կազմակերպել են տարբեր թեմաներով վարժանքներ: Այդ մասին առավել մանրամասն՝ այստեղ