Անցած շաբաթ ՀՀ արտակարգ իրավիճակների նախարարության փրկարար ծառայության ստորաբաժանումները արտակարգ իրավիճակների վերաբերյալ մոտ 400 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիա Ջուր», էլցանց, գազի վթարային ծառայություն, կանաչապատման, սանմաքրման ծառայություն, ոստիկանություն եւ այլն:
Գրանցվել է 80 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, ջերմահարվել են պտղատու եւ դեկորատիվ ծառեր: Փակ դուռ բացելու վերաբերյալ էլ 100 կանչ է ստացվել: Վատառողջ, ծանրաքաշ, սակավաշարժ քաղաքացուն բնակարանից իջեցնելու, բնակարան բարձրացնելու կամ բնակարանում տեղից տեղ տեղափոխելու կանչեր են սպասարկել Երեւանի Արաբկիր, Նոր Նորք, Աջափնյակ, Կենտրոն, Շենգավիթ, Մալաթիա-Սեբաստիա վարչական շրջանների եւ Արարատի փրկարարները: Տարբեր վայրերում արգելափակված (դիտահոր, վերելակի հորան, նկուղ, տանիք, շենքի օդատար-ծխատար, մեքենայի շարժիչի տակ եւ այլն) մի շարք կենդանիներ են ազատվել: Բնակավայրերի տարբեր մասերում՝ փողոցներ, բակեր, բնակիչներին անհանգստացնող շներին եւ կատուներին փրկարարները հեռացրել են անվտանգ տարածք: 12 օձ է հայտնաբերվել եւ տեղափոխվել անվտանգ տարածք: Տարբեր տարածքներում արգելափակված տասնյակ մեքենաներ են դուրս բերվել երթեւեկելի հատված:
Այլ կանչեր: Քանաքեռ-Զեյթունի փրկարարներն ահազանգ են ստացել, որ Թբիլիսյան խճուղու շենքերից մեկում ծածկոցը ընկել է ալեհավաքի վրա: փրկարարները ծածկոցը հեռացրել են ալեհավաքի վրայից: Աջափնյակի փրկարարներն ահազանգ են ստացել, որ Սիլիկյան թաղամասի տներից մեկում տեղադրված ջրի բաքի խողովակը խցանվել է, նկուղը ջրալցվում է: Փրկարարները տան նկուղից հեռացրել են մոտ 30 տոննա ջուր: Սյունեցի փրկարարներն ահազանգ են ստացել, որ Տաթեւ գյուղի ավտոճանապարհին տեղի է ունեցել քարաթափում, ավտոճանապարհը դարձել է միակողմանի երթևեկելի. անհրաժեշտ է փրկարարների օգնությունը: Հրշեջ-փրկարարների եւ ճանապարհը սպասարկող ընկերության աշխատակիցների ջանքերով մոտ 18 խմ քար է հեռացվել եւ վերականգնվել է ճանապարհի երթեւեկությունը:
Փրկարարները կազմակերպել են տարբեր թեմաներով վարժանքներ: Այդ մասին առավել մանրամասն՝ այստեղ եւ այստեղ: