Անցած շաբաթ ՀՀ արտակարգ իրավիճակների նախարարության փրկարար ծառայության ստորաբաժանումները արտակարգ իրավիճակների վերաբերյալ ավելի քան 300 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիա Ջուր», էլցանց, գազի վթարային ծառայություն, կանաչապատման, սանմաքրման ծառայություն, ոստիկանություն եւ այլն:
Գրանցվել է 50 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, ջերմահարվել են պտղատու եւ դեկորատիվ ծառեր: Փակ դուռ բացելու վերաբերյալ էլ 100 կանչ է ստացվել: Վատառողջ, ծանրաքաշ, սակավաշարժ քաղաքացուն բնակարանից իջեցնելու, բնակարան բարձրացնելու կամ բնակարանում տեղից տեղ տեղափոխելու կանչեր են սպասարկել Երեւանի Դավիթաշեն, Աջափնյակ, Արաբկիր, Կենտրոն, Ավան, Նոր Նորք վարչական շրջանների եւ Արարատի, Կոտայքի փրկարարները: Տարբեր վայրերում արգելափակված (դիտահոր, վերելակի հորան, նկուղ, տանիք, շենքի օդատար-ծխատար, մեքենայի շարժիչի տակ եւ այլն) մի շարք կենդանիներ են ազատվել: Բնակավայրերի տարբեր մասերում՝ փողոցներ, բակեր, բնակիչներին անհանգստացնող շներին եւ կատուներին փրկարարները հեռացրել են անվտանգ տարածք: Տարբեր տարածքներում արգելափակված տասնյակ մեքենաներ են դուրս բերվել երթեւեկելի հատված:
Այլ կանչեր. Սյունեցի փրկարարներն ահազանգ են ստացել, որ Քաջարան քաղաքում «Զանգեզուրի պղնձամոլիբդենային կոմբինատի» բաց հանքի տարածքում հայտնաբերվել է արկ, անհրաժեշտ է փրկարարների օգնությունը: Փրկարարները սահմանազատել են տարածքը, զինված ուժերի սակրավորները արկը տեղափոխել են անվտանգ տարածք և վնասազերվել:
Նոր Նորքի փրկարարները կեսգիշերից քիչ անց ահազանգ են ստացել, թե Մոլդովական փողոցի հանրակացարանում այրվում են էլ.հաշվիչներ: Հրդեհը մեկուսացվել է եւ մարվել, ծխալցվել է 30 բնակարան: Հրշեջ-փրկարարները տարհանել են 60 բնակչի և կատարել ծխահեռացման աշխատանքներ: Դավիթաշենի փրկարարներն ահազանգ են ստացել, թե 2-րդ թաղամասում գտնվող զբոսայգում ձի է շրջում: Հրշեջ-փրկարարները ձիուն տեղափոխել են անվտանգ տարածք: Քանաքեռ-Զեյթունի փրկարարներն ահազանգ են ստացել, թե Ռուբինյանց փողոցում խափանված տրոլեյբուսում (սրահում ուղևորներ չկան) կասկածելի արկղ է հայտնաբերվել: Հրշեջ-փրկարարները հայտնաբերել են ստվարաթղթե դատարկ արկղ: