Այսօր ՀՀ վարչապետ Կարեն Կարապետյանն այցելել էր արտակարգ իրավիճակների նախարարություն՝ 2017 թվականին կատարված աշխատանքի հաշվետվությանը եւ 2018-ի համար նախատեսված քայլերին ծանոթանալու նպատակով:
Նախարարությունում վարչապետին ներկայացվեց վերջին 5 ամսում ստացված տեխնիկան: Այս ընթացքում ԱԻՆ տարբեր ստորաբաժանումները հայ-ռուսական մարդասիրական արձագանքման կենտրոնից ստացել են 16 միլիոն դոլարի, ԱՄՆ կառավարությունից 500 հազար դոլարի գույք՝ մեքենաներ, հատուկ գործիքներ, հանդերձանք եւ այլն: Այլ երկրներում որոնողափրկարարական աշխատանքներ իրականացնելիս, մեր փրկարարները կարող են օգտագործել այս գույքը: «Տեխնիկական վերազինման աշխատանքները տպավորիչ են: Պետք է շնորհակալություն հայտնենք մեր գործընկերներին՝ օժանդակության համար»,- հայտարարեց Կարեն Կարապետյանը:
ԱԻ նախարար Դավիթ Տոնոյանը նշեց, որ նախարարությունն աշխատում է Աղետների ռիսկի կառավարման ազգային ռազմավարության եւ ՀՀ կառավարության 2017-2022 թթ ծրագրի շրջանակներում, հետապնդելով մեկ նպատակ. բնական և մարդածին աղետների ռիսկի նվազեցում, հնարավոր հետևանքների կանխարգելում եւ վերացում՝ պետության անվտանգության ապահովում:
Այս նպատակի համար 2018-ին նախատեսված են մի շարք ծրագրեր: Մասնավորաբար. ՄԱԿ-ի Զարգացման ծրագրի եւ Գլոբալ Էկոլոգիական հիմնադրամի աջակցությամբ՝ 275 000 դոլարով կկառուցվի Հայաստանում խորհրդային տարիներից մնացած թունաքիմիակտների, քիմիապես վտանգավոր նյութերի հավաքման, դասակարգման, պիտակավորման, փաթեթավորման, անվտանգ պահպանման և հետագայում դրանց ոչնչացման մեկ ընդհանուր պահեստարան:
Անտառային հրդեհների դեմ պայքարի արդյունավետության բարձրացման նպատակով գյուղատնտեսության, բնապահպանության նախարարությունների հետ համատեղ կկազմակերպվեն ուսումնավարժություններ, կխորացվի համագործակցությունն անտառտնտեսությունների և համայնքների հետ:
2018 թվականին սպասվող խոշոր իրադարձությունների ժամանակ՝ առաջին հանրապետության 100-ամյակ, Էրեբունի-Երեւան տոն, ֆրանկոֆոնիայի համաժողով, ԱԻՆ ստորաբաժանումները կաշխատեն ուժեղացված ռեժիմով՝ մարտական պատրաստականության բարձր աստիճանով:
Իսկ Սպիտակի երկրաշարժի 30-րդ տարելիցին կնշվի «Աղետներին դիմակայունության օր» կամ «Դիմակայուն Հայաստան» միջոցառմամբ, որի շրջանակներում կկազմակերպվեն համապետական վարժանք, գիտաժողովներ, դաշտային խոհանոցի միջազգային մրցույթ և հիշատակման արարողություն:
Դավիթ Տոնոյանի զեկույցից հետո վարչապետը հայտարարեց. «2018 թվականը, կարծում եմ, շատ կարևոր է: Մակրո առումով, մեր կառավարության առջև ի՞նչ խնդիրներ են կանգնած. մենք 2018, 2019, 2020, 2021 թվականներին ունենալու ենք տնտեսական հաջողություններ, որոնք մեզ հիմք և իրավունք են տալու մեր երկրում կատարել երկարատև, ֆունդամենտալ ռեֆորմներ, որոնք ունեն երկար հորիզոն և ստեղծում են հաստատուն աճի հիմք: Բոլոր ճգնաժամերը գալիս են հորիզոնի կարճատևությունից. Արտակարգ իրավիճակների նախարարությունում կարճատև մտածելու իրավունք ուղղակի չունենք: Մենք պետք է հստակ իմանանք՝ ուր ենք գնում, ինչպես ենք գնում, ամեն տարի ինչ խնդիր ենք դնում»: