Գլխավոր Նորություններ ՍՈՂՈՒՆՆԵՐՆ ԱԿՏԻՎԱՑԵԼ ԵՆ

ՍՈՂՈՒՆՆԵՐՆ ԱԿՏԻՎԱՑԵԼ ԵՆ

474
Տարածել

Շոգ եղանակին սողունների հանդիպելիս պետք է հետևել ճիշտ վարքականոններին, քանի որ մարդիկ սովորաբար սարսափում են հենց միայն նրանց տեսքից ու հաճախ չեն կարողանում ճիշտ գործել։

Ըստ վիճակագրության՝ օձի խայթոցից մահացությունների դեպքում մարդկանց մոտ 40 տոկոսը մահացել է ոչ թե թույնից, այլ՝ սարսափից։ Արագ կողմնորոշվելու և ճիշտ օգնություն ցույց տալ դեպքում վատագույնից խուսափել հնարավոր է։

Ի՞նչ անել

. Ոչ թունավոր օձի խայթոցի դեպքում վերքը լվացեք և ծածկեք մանրէազերծ վիրակապով։

. Հնարավորության դեպքում աշխատեք հիշել օձի տեսքը։

. Օձի խայթոցից հետո առաջին 5 րոպեի ընթացքում սեղմեք խայթած հատվածի շուրջը, որպեսզի արյունը դուրս հոսի վերքից։ Այս գործողությունը թույլ է տալիս որոշ չափով հեռացնել թույնը։ Սեղմելը դադարեցրեք, երբ վերքից այլևս արյուն դուրս չգա։

. Հանգստացրեք տուժածին, քանի որ նյարդային, գրգռված վիճակն արագացնում է արյան շրջանառությունը` նպաստելով մարմնում թույնի տարածմանը։

. Հանեք բոլոր զարդերը և ճնշող իրերը։

. Եթե օձը խայթել է վերջույթը, ապա անշարժացրեք այն և պահեք սրտի մակարդակից ցածր։ Սահմանափակեք տուժածի շարժումները, նստեցրեք կամ պառկեցրեք նրան։

. Թունավոր օձի խայթելու դեպքում ժամանակն ամենաորոշիչ գործոնն է։ Շատ կարևոր է արագ ահազանգը կամ տուժածի արագ տեղափոխումը հիվանդանոց, սակայն դա պետք է անել առանց խուճապի մատնվելու՝ բացառելով տուժածի ցանկացած շարժում։ Այդ ընթացքում տուժածին տվեք մեծ քանակությամբ հեղուկներ` ջուր, հյութ, թեյ, թան և այլն։ Վերահսկեք տուժածի վիճակը, տվյալները գրանցեք և ցուցաբերեք համապատասխան առաջին օգնությունը։

Ի՞նչ չանել

Կան գործողություններ, որոնք չի կարելի անել օձերի խայթոցների դեպքում։

. Մի արտածծեք թույնը բերանով. բերանում եղած անգամ փոքր վերքից թույնը կարող է անցնել ձեր օրգանիզմ։

. Խայթած հատվածի շրջանում կտրվածքներ մի արեք, մի այրեք վնասված հատվածը. ցավն արագացնում է արյան շրջանառությունը, ինչը նպաստում է թույնի տարածմանը։

. Մի օգտագործեք սառը թրջոցներ և սառցապարկեր. դրանք օգուտ չեն տա տուժածին և կարող են հակառակ ազդեցություն ունենալ։

. Օձերի խայթոցների դեպքում չի կարելի տեղադրել լարան՝ սեղմող միջոցներ. սա կբերի տվյալ հատվածի հյուսվածքների մեկուսացման, ինչի հետևանքով տուժածը կարող է կորցնել վերջույթը։

. Տուժածին մի տվեք ոգելից խմիչքներ. դրանք ևս արագացնում են արյան շրջանառությունը։

 

ՀՀ ԱԻՆ-ը հորդորում է լինել զգոն և սողունների սեզոնային ակտիվացումը չդիտարկել

որպես մեծ վտանգ: