Գլխավոր ՀՀ ԱԻՆ ՓՐԿԱՐԱՐՆԵՐԸ ՔԱՂԱՔԱՑՈՒՆ ԱՓ ԵՆ ԴՈՒՐՍ ԲԵՐԵԼ

ՓՐԿԱՐԱՐՆԵՐԸ ՔԱՂԱՔԱՑՈՒՆ ԱՓ ԵՆ ԴՈՒՐՍ ԲԵՐԵԼ

569
Տարածել

Անցած յոթ օրում ՀՀ ԱԻՆ փրկարար ծառայության ստորաբաժանումները արտակարգ իրավիճակների վերաբերյալ մոտ 300 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիաջուր», էլցանց, գազի վթարային ծառայություն, կանաչապատման, սանմաքրման ծառայություն, ոստիկանություն և այլն:

Գրանցվել է ավելի քան 40 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, ջերմահարվել են պտղատու և դեկորատիվ ծառեր: Փակ դուռ բացելու վերաբերյալ էլ 80 կանչ է ստացվել: Վատառողջ, ծանրաքաշ, սակավաշարժ քաղաքացուն բնակարանից իջեցնելու կամ բնակարանում տեղից տեղ տեղափոխելու կանչեր են սպասարկել Երևանի Աջափնյակ, Կենտրոն, Նոր Նորք, Արաբկիր, Ավան վարչական շրջանների և Արարատի փրկարարները:  Ջերմաստիճանի բարձրացման հետ ակտիվանում են օձերը: Բնակարանում հայտնված օձին բռնելու և անվտանգ տարածք տեղափոխելու վեց կանչ է սպասարկվել: Տարբեր վայրերում արգելափակված (դիտահոր, վերելակի հորան, նկուղ, շենքի օդատար-ծխատար, մեքենայի շարժիչի տակ և այլն) մի շարք կենդանիներ են ազատվել:

Այլ կանչեր. Աջափնյակի փրկարարներն ահազանգ են ստացել, թե Լուկաշինի 2-րդ փողոցում գտնվող Ջ.Աբրահամյանի անվան թիվ 111 հիմնական դպրոցի տանիք գնդակ է ընկել,  իջեցնելու համար անհրաժեշտ է փրկարարների օգնությունը: Դեպքի վայր հասած փրկարարները պարզել են, որ գնդակը դպրոցի հարևանությամբ գտնվող ծառի վրա է, իջեցրել են գնդակը և հանձնել տիրոջը: Էրեբունու փրկարարները ահազանգ են ստացել, թե հրդեհ է բռնկվել Նոր Արեշի 7-րդ փողոցի տներից մեկում: Մինչ հրշեջ-փրկարարների կանչի վայր հասնելը՝ հրդեհը մարվել է տեղի ուժերով: Լարված վիճակում է եղել տան բնակիչներից մեկը, որին  հոգեբան-փրկարարը ցուցաբերել է հոգեբանական աջակցություն: Արագածոտնի փրկարարներն ահազանգ են ստացել մի քաղաքացուց, թե ինքը մոլորվել է Լեռնապար գյուղի մոտակայքում և մթության պատճառով չի կարողանում գտնել վերադարձի ճանապարհը: Հրշեջ-փրկարարներն ու ոստիկանները Հարթավան գյուղի ավտոճանապարհին գտել են քաղաքացուն: Լոռեցի փրկարարներն ահազանգ են ստացել, թե Ալավերդի քաղաքի մարզադաշտի մոտակա գետում քաղաքացին արգելափակվել է քարերի արանքում, առկա է գետն ընկնելու վտանգ: Պարզվել է, որ քաղաքացին Դեբեդ գետի միջնամասում նստել է քարի վրա և չի կարողանում ափ դուրս գալ: Հրշեջ-փրկարարները 17-ամյա քաղաքացուն դուրս են բերել ափ: Իսկ վանաձորցի փրկարարները քաղաքի մարզադաշտի մոտակայքում չշահագործվող լողավազանն ընկած 33-ամյա քաղաքացուն են դուրս բերել և հանձնել բժիշկներին: