Այրվածք առաջացնող գործոնի հեռացումից հետո անգամ փափուկ հյուսվածքները շարունակում են ենթարկվել ջերմային վնասման՝ առաջացնելով լրացուցիչ վնասվածքներ: Հետևաբար, անհրաժեշտ է սառեցնել այրված մակերեսը: Դրա համար կարելի է օգտագործել ձեռքի տակ եղած ցանկացած հարմար միջոց՝ դույլ, ցնցուղ: Չպետք է օգտագործել սառույց կամ սառցաջուր: Դեմքին կամ մարմնի այն մասերին, որոնք հնարավոր չէ սառեցնել հոսող ջրով, տեղադրեք սառը, թաց սրբիչ կամ սավան: Եթե թրջոցը տաքանում է մարմնի ջերմաստիճանից, ապա ժամանակ առ ժամանակ փոխեք թրջոցները:
Այրվածքի մակերեսը պետք է սառեցնել առնվազն 15-20 րոպե: Եթե այրված մասը ջրից հանելիս տուժածը շարունակում է ցավ զգալ, կամ այրված մակերեսը դեռ տաք է, ապա շարունակեք սառեցումը: Եթե այրվածքը տարածուն է, պետք չէ երկար ժամանակ պահել այն ջրի տակ՝ մարմնի գերսառեցումից խուսափելու համար: Չի կարելի սառեցնել խոր թափանցող և էլեկտրական այրվածքները:
Այրվածի դեպքում
- Մի պոկեք մարմնին կպած հագուստը, որպեսզի մաշկը լրացուցիչ չվնասվի, այլ մկրատով զգուշությամբ կտրեք և հեռացրեք հագուստի ազատ մասերը:
- Մի օգտագործեք կարագ, յուղ կամ այլ նման միջոցներ:
- Մի բացեք կամ վնասեք բշտերը:
- Մի դիպեք այրված մակերեսին:
- Մի շնչեք այրվածքի վրա:
- Մի սառեցրեք ջրով՝ խոր թափանցող կամ էլեկտրական այրվածքները:
- Մի դիպեք էլեկտրահարված տուժածին հոսանքն անջատելուց առաջ:
