Անցած յոթ օրում ՀՀ արտակարգ իրավիճակների նախարարության փրկարար ծառայության ստորաբաժանումները արտակարգ իրավիճակների վերաբերյալ մոտ 350 ահազանգի են արձագանքել: Շատ հաճախ փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիաջուր», էլցանց, գազի վթարային ծառայություն, կանաչապատման, սանմաքրման ծառայություն, ոստիկանություն և այլն:
Գրանցվել է մոտ 50 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, ջերմահարվել են պտղատու և դեկորատիվ ծառեր: Փակ դուռ բացելու վերաբերյալ էլ 100 կանչ է ստացվել: Վատառողջ, ծանրաքաշ, սակավաշարժ քաղաքացուն բնակարանից իջեցնելու կամ բնակարանում տեղից տեղ տեղափոխելու կանչեր են սպասարկել Երևանի Կենտրոն, Արաբկիր, Նոր Նորք վարչական շրջանների և Շիրակի, Արարատի, Լոռու փրկարարները: Տարբեր վայրերում արգելափակված (դիտահոր, վերելակի հորան, նկուղ, շենքի օդատար-ծխատար, մեքենայի շարժիչի տակ և այլն) մի շարք կենդանիներ են ազատվել: Գետերի ու լճերի ափերին կամ այլ վայրերում ցեխակույտի մեջ արգելափակված 3 մեքենա է հանվել երթևեկելի մաս: 15 օձ է հայտնաբերվել և տեղափոխվել անվտանգ տարածք:
Հունիսի 20-ի երեկոյան Երևանում ուժեղ քամին պոկել է տանիքներ, ծածկեր, կոտրել ծառի ճյուղեր: Բարեբախտաբար, մարդկային զոհեր չկան: Քամուց հետո մոտ մեկ տասնյակ ահազանգ է ստացվել: Փրկարարները հեռացրել են տեղահան եղած ծածկեր, մեքենաների վրա ընկած կամ փողոց փակած կոտրված ճյուղեր: Օրինակ, Զաքյան փողոցում ծառը պոկվել-ընկել է և փակել գեղեցկության սրահի մուտքը: Փրկարարները հեռացրել են ծառը, բացել մուտքը և դուրս բերել աշխատակիցներին:
Այլ կանչեր. Տավուշի փրկարարներն ահազանգ են ստացել, որ Իջևան քաղաքի Մելիքբեկյան փողոցում ագռավն արգելափակվել է ծառի ճյուղերի արանքում, դուրս բերելու համար անհրաժեշտ է փրկարարների օգնությունը: Դեպքի վայր մեկնած փրկարարները պարզել են, որ ագռավը սատկած է, և իջեցրել են ծառից: Կոտայքի փրկարարներն ահազանգ են ստացել, որ Հրազդան քաղաքի Կոճոռ թաղամասում մի կին ընկել է ջրանցքը. անհրաժեշտ է փրկարարների օգնությունը: Հրշեջ-փրկարարները ջրանցքից (ընկած վայրից մոտ 300 մ հեռավորությունից) դուրս են բերել 55-ամյա կնոջը և մոտեցրել շտապօգնության ավտոմեքենային: Տուժածը հոսպիտալացվել է Հրազդանի բժշկական կենտրոն: Բժիշկները տուժածի առողջական վիճակը գնահատել են բավարար: