Անցած յոթ օրում ՀՀ ԱԻՆ փրկարար ծառայության ստորաբաժանումները արտակարգ իրավիճակների վերաբերյալ մոտ 300 ահազանգի են արձագանքել: Շատ դեպքերում փրկարարները դեպքի վայր մեկնելուն զուգահեռ տեղեկությունը փոխանցել են այլ ծառայության. շտապօգնություն, «Վեոլիաջուր», էլցանց, գազի վթարային ծառայություն, կանաչապատման, սանմաքրման ծառայություն, ոստիկանություն և այլն:
Գրանցվել է մոտ 30 հրդեհ. այրվել են տան գույք, շինությունների փայտյա կառուցատարրեր, շինանյութ, անասնակեր, բուսածածկ տարածքներ, ջերմահարվել են պտղատու և դեկորատիվ ծառեր: Փակ դուռ բացելու վերաբերյալ էլ 100 կանչ է ստացվել: Վատառողջ, ծանրաքաշ, սակավաշարժ քաղաքացուն բնակարանից իջեցնելու կամ բնակարանում տեղից տեղ տեղափոխելու կանչեր են սպասարկել Երևանի Նոր Նորք, Դավիթաշեն, Աջափնյակ, Կենտրոն, Քանաքեռ-Զեյթուն վարչական շրջանների և Շիրակի փրկարարները: Տարբեր վայրերում արգելափակված (դիտահոր, վերելակի հորան, նկուղ, շենքի օդատար-ծխատար, մեքենայի շարժիչի տակ և այլն) մի շարք կենդանիներ են ազատվել: Գետերի ու լճերի ափերին կամ այլ վայրերում ցեխակույտի մեջ արգելափակված 5 մեքենա է հանվել երթևեկելի մաս: Ութ օձ է հայտնաբերվել և տեղափոխվել անվտանգ տարածք:
Այլ կանչեր. Կենտրոնի փրկարարներն ահազանգ են ստացել, թե Հաղթանակի կամրջին կասկածելի պահվածքով երիտասարդ աղջիկ կա: Դեպքի վայր հասած փրկարարները նման քաղաքացու չեն տեսել, սակայն տեղում պարզել են, որ աղջիկն այլազգի զբոսաշրջիկ է, ուղղակի զբոսնում է: Աջափնյակի փրկարարներն ահազանգ են ստացել, թե Մելքումով փողոցում, մանկապարտեզի բակում ագռավները հարձակվում են երեխաների վրա: Հրշեջ-փրկարարները հեռացրել են ագռավներին: Կոտայքի փրկարարներն ահազանգ են ստացել, թե Զովունի գյուղում ցուլը փախել է գոմից և հարձակվում է քաղաքացիների վրա: Փրկարարները ցուլին հայտնաբերել են սեփականատիրոջ տանից մի քանի փողոց հեռու, պարաններով կապել և տեղափոխել անասնագոմ: Վայոց ձորի փրկարարներն ահազանգ են ստացել, թե Մարտիրոս գյուղի մատույցներում ճանապարհի անանցանելիության պատճառով շտապօգնության ավտոմեքենան չի կարողանում շարունակել ընթացքը, մոտենալ հիվանդին: Հրշեջ-փրկարարներն 34-ամյա հիվանդին մոտ 15 կմ տեղափոխել և մոտեցրել են շտապօգնության ավտոմեքենային:
